ٹرمپ کا اعلان، امریکی شہریوں کو ٹیرف آمدن سے 2 ہزار ڈالر دیے جائیں گے

واشنگٹن : امریکی صدر ڈونلڈ ٹرمپ نے اعلان کیا ہے کہ امریکا کو تجارتی محصولات (ٹیرف) سے حاصل ہونے والی اضافی آمدن کا بڑا حصہ شہریوں میں ڈیویڈنڈ کی صورت میں تقسیم کیا جائے گا۔

ٹرمپ نے اپنے سوشل میڈیا پلیٹ فارم ٹروتھ سوشل پر ایک پوسٹ میں کہا کہ ہر امریکی شہری کو کم از کم 2 ہزار ڈالر دیے جائیں گے، البتہ زیادہ آمدنی والے افراد اس سکیم کے اہل نہیں ہوں گے۔

انہوں نے کہا:

"ہم کھربوں ڈالر حاصل کر رہے ہیں اور بہت جلد 37 کھرب ڈالر کے قرضوں کی ادائیگی شروع کریں گے۔ ہر شخص کو (زیادہ آمدن والے افراد کے علاوہ) کم از کم 2 ہزار ڈالر ادا کیے جائیں گے۔”

غیر ملکی میڈیا کے مطابق، امریکی سپریم کورٹ اس وقت ٹرمپ کی نافذ کردہ تجارتی ٹیرف پالیسی کے قانونی جواز کا جائزہ لے رہی ہے، کیونکہ اس سے قبل کئی ماتحت عدالتیں بعض محصولات کو غیر قانونی قرار دے چکی ہیں۔

یاد رہے کہ اکتوبر میں ایک انٹرویو کے دوران ٹرمپ نے تجویز دی تھی کہ عوام کو 1 سے 2 ہزار ڈالر دیے جا سکتے ہیں، اور ان کے مطابق محصولات سے امریکا کو سالانہ ایک کھرب ڈالر سے زائد آمدن حاصل ہو سکتی ہے۔

سیاسی مبصرین کے مطابق، یہ اعلان آئندہ امریکی انتخابات سے قبل عوامی حمایت حاصل کرنے کی ایک بڑی کوشش سمجھا جا رہا ہے۔