ایف بی آئی کا انتباہ: شہریوں کو سائبر حملوں کا سامنا

سائبر کرمنلز کی جانب سے دھوکہ دہی کی نئی مہم، ہزاروں افراد متاثر

امریکہ میں سائبر سیکیورٹی کا ایک نیا خطرہ سامنے آیا ہے جہاں شہریوں کو جعلی میسجز کے ذریعے دھوکہ دینے کی کوشش کی جا رہی ہے۔ امریکی تحقیقاتی ادارے ایف بی آئی کے مطابق، حالیہ دنوں میں ہزاروں امریکی شہریوں نے شکایت کی ہے کہ انہیں بھاری ٹریفک چالان کے حوالے سے پیغامات موصول ہو رہے ہیں، جن میں جون کے مہینے تک ادائیگی کرنے کی ہدایت کی جاتی ہے۔

ان پیغامات میں دھمکی دی گئی ہے کہ وقت پر ادائیگی نہ کرنے کی صورت میں ڈرائیونگ لائسنس معطل ہو سکتا ہے یا قید کی سزا ہو سکتی ہے۔ ایف بی آئی نے شہریوں کو خبردار کیا ہے کہ ایسے تمام پیغامات فوری طور پر ڈیلیٹ کر دیں کیونکہ محکمہ موٹر وہیکل یا دیگر سرکاری ادارے کبھی بھی پیغامات کے ذریعے براہ راست رابطہ نہیں کرتے۔

سائبر حملوں میں غیر معمولی اضافہ

رپورٹس کے مطابق، سائبر مجرموں نے اینڈرائیڈ اور آئی فون صارفین کے خلاف ایک نئی دھوکہ دہی کی مہم شروع کی ہے۔ ماہرین کا کہنا ہے کہ رواں ماہ اس قسم کے فراڈ میں 700 فیصد سے زائد اضافہ دیکھا گیا ہے۔

ان جعلی پیغامات میں اکثر ایسے لنکس شامل ہوتے ہیں جو دیکھنے میں سرکاری ویب سائٹس جیسے لگتے ہیں، مگر ان کا مقصد صرف لوگوں کی نجی معلومات اور کریڈٹ کارڈ ڈیٹیلز چرانا ہوتا ہے۔

حکام کی ہدایت

سائبر سیکیورٹی حکام نے شہریوں کو خبردار کیا ہے کہ وہ کسی بھی مشکوک پیغام پر ہرگز کلک نہ کریں اور فوری طور پر اسے حذف کر دیں۔ ساتھ ہی اپنی ذاتی معلومات کو ہمیشہ محفوظ رکھنے کی تاکید کی گئی ہے۔