نسیم شاہ کے گھر پر فائرنگ، پولیس نے ممکنہ وجہ بتا دی

قومی کرکٹ ٹیم کے فاسٹ بولر نسیم شاہ کے گھر پر فائرنگ کے واقعے کی تحقیقات میں پیش رفت سامنے آ گئی ہے۔ پولیس کے مطابق واقعہ دہشت گردی کا نہیں بلکہ ممکنہ طور پر اراضی کے تنازع یا علاقائی عناد کا نتیجہ ہو سکتا ہے۔

پولیس کے مطابق، نسیم شاہ کے حجرے پر فائرنگ کا مقدمہ درج کر لیا گیا ہے اور شواہد اکھٹے کیے جا چکے ہیں۔ واقعے کی تحقیقات ہر پہلو سے جاری ہیں۔

ڈی پی او لوئر دیر نے نسیم شاہ کے والد سے ملاقات کی اور ملزمان کی جلد گرفتاری کی یقین دہانی کرائی۔

ذرائع کے مطابق، نامعلوم افراد نے رات کے وقت فائرنگ کی جس کے بعد ملزمان فرار ہو گئے۔ خوش قسمتی سے واقعے میں کوئی جانی نقصان نہیں ہوا۔

پولیس کے مطابق فائرنگ کے وقت نسیم شاہ گھر پر موجود نہیں تھے، جبکہ ان کے والد نے مؤقف اختیار کیا ہے کہ ان کی کسی سے کوئی دشمنی یا تنازع نہیں۔

یہ بھی پڑھیں : لوئردیر: نسیم شاہ کے حجرے پر فائرنگ، مقدمہ درج