سڈنی کے ہاربر برج پر ہزاروں افراد کا غزہ کے لیے مارچ

اتوار کے روز آسٹریلیا کے شہر سڈنی میں شدید بارش کے باوجود ہزاروں افراد نے ہاربر برج پر مارچ کیا۔ مظاہرین نے غزہ میں اسرائیلی حملوں کے خلاف آواز بلند کی اور فوری جنگ بندی کا مطالبہ کیا۔ وہ انسانی امداد کی بحالی اور آزاد فلسطینی ریاست کے قیام کا مطالبہ بھی کر رہے تھے۔

یہ مظاہرہ ’’مارچ برائے انسانیت‘‘ کے عنوان سے منعقد ہوا۔ اس میں ہر عمر اور طبقے کے افراد شریک تھے، جن میں خاندان، بزرگ شہری اور نوجوان شامل تھے۔ بہت سے مظاہرین نے فلسطینی پرچم اٹھا رکھے تھے جبکہ کچھ لوگ بھوک کی علامت کے طور پر برتن اور دیگچیاں ساتھ لائے تھے۔ مارچ کے دوران "ہم سب فلسطینی ہیں” جیسے نعرے بھی لگائے گئے۔

نیو ساؤتھ ویلز پولیس کے مطابق مظاہرے میں 90 ہزار سے زائد افراد شریک تھے۔ تاہم منتظمین نے دعویٰ کیا کہ شرکا کی تعداد 3 لاکھ کے قریب تھی۔ یہ احتجاج اس وقت ممکن ہوا جب عدالت نے مظاہرین کو مارچ کی اجازت دی۔

مارچ میں کچھ آسٹریلوی سیاست دانوں نے بھی شرکت کی۔ ان میں لیبر پارٹی کے رکن ایڈ حسین اور گرینز پارٹی کی سینیٹر مہرین فاروقی شامل تھیں۔ دونوں نے اسرائیل پر سخت پابندیاں لگانے اور فلسطینی ریاست کو تسلیم کرنے کا مطالبہ کیا۔

وزیراعظم انتھونی البانیز نے دو ریاستی حل کی حمایت کا اعادہ کیا ہے، لیکن انہوں نے اب تک فلسطین کو ریاست کے طور پر تسلیم نہیں کیا۔ حکومت کو انسانی حقوق کے کارکنوں اور سیاسی رہنماؤں کی طرف سے اس معاملے پر دباؤ کا سامنا ہے۔

یہ مارچ ایک ایسے وقت میں ہوا ہے جب فرانس، کینیڈا اور برطانیہ جیسے ممالک فلسطینی ریاست کو تسلیم کرنے پر غور کر رہے ہیں۔ اسرائیل نے ان اقدامات کی سخت مخالفت کی ہے اور انہیں امن کے خلاف قرار دیا ہے۔