آئی سی سی اجلاس میں ایشیا کپ ٹرافی کا معاملہ زیرِ بحث نہیں آیا

دبئی : ذرائع کے مطابق آئی سی سی (انٹرنیشنل کرکٹ کونسل) کے اجلاس میں ایشیا کپ کی ٹرافی کا معاملہ زیرِ بحث نہیں آیا۔

ذرائع کا کہنا ہے کہ بھارتی کرکٹ بورڈ (بی سی سی آئی) نے بھی اجلاس کے دوران ٹرافی سے متعلق کوئی بات نہیں کی۔

اجلاس کے بعد بعض بورڈ ممبران نے غیر رسمی گفتگو میں تجویز دی کہ پاکستان اور بھارت کو اس معاملے کو افہام و تفہیم سے حل کرنا چاہیے تاکہ کسی بھی قسم کی غلط فہمی کو ختم کیا جا سکے۔

ذرائع نے بتایا کہ آئی سی سی بورڈ میٹنگ دبئی میں گزشتہ روز منعقد ہوئی جس میں پاکستان کرکٹ بورڈ (پی سی بی) کے چیئرمین محسن نقوی نے بھی شرکت کی۔

یہ بھی پڑھیں : ٹرافی نہ لینے پر بھارتی ٹیم کے خلاف کارروائی کا مطالبہ

ذرائع کے مطابق محسن نقوی نے اجلاس میں واضح کیا کہ “ایشیا کپ ٹرافی کا معاملہ ضرور حل ہونا چاہیے۔”

یاد رہے کہ ایشیا کپ ٹرافی سے متعلق تنازع گزشتہ سال کے ایونٹ کے بعد سامنے آیا تھا، جب ٹرافی کی حوالگی اور نمائندگی سے متعلق سوالات اٹھائے گئے تھے۔