اسلام آباد جی الیون کچہری خودکش دھماکا، 12 افراد شہید

آج دوپہر اسلام آباد جی الیون کچہری خودکش دھماکا کے نتیجے میں 12 افراد شہید اور متعدد زخمی ہوگئے۔ دھماکا منگل کے روز تقریباً ساڑھے بارہ بجے جی الیون سیکٹر کی کچہری کے قریب ہوا جس کی آواز دور دور تک سنی گئی۔ پولیس اور امدادی ٹیمیں فوری طور پر موقع پر پہنچیں اور زخمیوں کو اسپتال منتقل کیا۔

پولیس کے مطابق حملہ آور موٹر سائیکل پر سوار تھا جو پولیس کی گاڑی کے قریب پہنچ کر خود کو دھماکے سے اڑا لیا۔ دھماکے کے نتیجے میں قریب کھڑی گاڑیوں میں آگ لگ گئی اور حملہ آور کے اعضا کچہری کے احاطے میں جا گرے۔ تین گاڑیاں متاثر ہوئیں جن میں ایک پولیس کی اور دو نجی گاڑیاں شامل ہیں۔

ابتدائی اطلاعات کے مطابق دھماکے میں 12 افراد موقع پر شہید اور 20 سے زائد زخمی ہوئے جن میں وکلا اور سائلین بھی شامل ہیں۔ زخمیوں کو پمز اسپتال منتقل کیا گیا جہاں ایمرجنسی نافذ کر دی گئی ہے۔ قانون نافذ کرنے والے اداروں نے علاقے کو گھیرے میں لے کر شواہد اکٹھے کرنا شروع کر دیے ہیں۔

مزید پڑھیں: کراچی: کورنگی میں اسٹیٹ ایجنسی میں فائرنگ، 2 افراد ہلاک

پولیس ذرائع کا کہنا ہے کہ ابتدائی تحقیقات سے پتہ چلتا ہے کہ حملے میں بھارتی حمایت یافتہ اور افغان طالبان سے منسلک گروہ ملوث ہوسکتے ہیں۔ سیکیورٹی ادارے اس بات کی مکمل جانچ کر رہے ہیں کہ حملہ آور کے پیچھے کون سے عناصر کارفرما تھے۔

وزیرِ داخلہ محسن نقوی نے میڈیا سے گفتگو میں بتایا کہ خودکش حملہ آور کچہری کے اندر داخل ہونے کی کوشش میں تھا مگر پولیس گاڑی آتے ہی اس نے دھماکا کر دیا۔ ان کے مطابق 12 افراد شہید اور 27 زخمی ہوئے۔ وزیرِ داخلہ نے کہا کہ اسلام آباد جی الیون کچہری خودکش دھماکا میں ملوث تمام کرداروں کو شناخت کر کے انصاف کے کٹہرے میں لایا جائے گا، اور وانا میں ہونے والے حالیہ خودکش حملے کی طرح اس میں بھی افغان روابط کے شواہد ملے ہیں۔