AI ماڈلز میں نئی ​​جدت، ڈیپ سیک کا جدید FP8 فارمیٹ متعارف

چینی مصنوعی ذہانت اسٹارٹ اپ ڈیپ سیک (DeepSeek) نے اپنے فلیگ شپ V3 ماڈل کو اپ گریڈ کر دیا ہے۔ نئے فیچر کی بدولت ماڈل کی رفتار پہلے سے تیز ہو گئی ہے۔ یہ اپ گریڈ اس بات کو ظاہر کرتا ہے کہ کمپنی اپنی ٹیکنالوجی کو چین کی بڑھتی ہوئی سیمی کنڈکٹر انڈسٹری کے مطابق تیار کر رہی ہے۔

اس سال ڈیپ سیک نے عالمی سطح پر توجہ حاصل کی تھی جب اس نے ایسے ماڈلز جاری کیے جو اوپن اے آئی کے چیٹ جی پی ٹی جیسے مغربی ماڈلز کا مقابلہ کرتے ہیں۔ فرق یہ ہے کہ ڈیپ سیک کے ماڈلز کم لاگت میں کام کرتے ہیں۔ اس کامیابی کو چین کی عالمی مصنوعی ذہانت کی دوڑ میں بڑی پیش رفت قرار دیا جا رہا ہے۔

اس اپ گریڈ سے پہلے کمپنی نے مارچ میں V3 ماڈل اور مئی میں R1 ماڈل میں بھی اپڈیٹس دی تھیں۔ اس سے ظاہر ہوتا ہے کہ کمپنی مسلسل اپنی ٹیکنالوجی بہتر بنانے پر کام کر رہی ہے۔

ڈیپ سیک کے مطابق نیا V3.1 ماڈل UE8M0 FP8 پریسیژن فارمیٹ استعمال کرتا ہے۔ یہ ڈیزائن جلد متعارف ہونے والے مقامی چِپس کیلئے بنایا گیا ہے۔ تاہم کمپنی نے یہ نہیں بتایا کہ یہ اپ گریڈ کن چِپس یا مینوفیکچررز کو سپورٹ کرے گا۔ FP8 فارمیٹ کی بدولت ماڈل کم میموری کے ساتھ زیادہ تیز رفتار پر کام کرتا ہے۔

V3.1 ماڈل میں ایک ہائبرڈ انفیرنس سٹرکچر بھی شامل ہے۔ اس فیچر سے ماڈل "reasoning” اور "non-reasoning” دونوں موڈز میں چل سکتا ہے۔ صارفین کمپنی کی ایپ یا ویب پلیٹ فارم پر "deep thinking” بٹن کے ذریعے آسانی سے موڈز بدل سکتے ہیں۔ یہ فیچر زیادہ لچکدار کارکردگی کی بڑھتی ہوئی ضرورت کو ظاہر کرتا ہے۔