پاکستان اور بنگلہ دیش کے درمیان تعلقات مضبوط بنانے کیلئے 6 اہم معاہدوں پر دستخط

ڈپٹی وزیراعظم اور وزیر خارجہ اسحاق ڈار نے ڈھاکا میں بنگلہ دیش کے مشیر خارجہ سے ملاقات کی۔ اس ملاقات میں دونوں ملکوں نے تعلقات کو مزید مضبوط بنانے اور تعاون بڑھانے کے عزم کا اعادہ کیا۔

وزارت خارجہ کے مطابق بات چیت میں اعلیٰ سطحی روابط، تجارت اور اقتصادی تعاون، عوامی تعلقات، ثقافتی تبادلے، تعلیم اور انسانی ہمدردی کے مسائل پر گفتگو ہوئی۔ اس کے ساتھ ساتھ سارک کی بحالی، مسئلہ فلسطین اور روہنگیا کے مسئلے پر بھی بات کی گئی۔

پاکستانی وفد کی قیادت اسحاق ڈار نے کی جبکہ بنگلہ دیشی وفد کی سربراہی محمد توحید حسین نے کی۔ دونوں جانب سے متعلقہ محکموں کے اعلیٰ حکام بھی اجلاس میں شریک ہوئے۔

مذاکرات کے بعد اہم معاہدوں پر دستخط کی تقریب ہوئی۔ اس دوران پاکستان اور بنگلہ دیش کے درمیان 6 معاہدے اور یادداشتوں پر دستخط ہوئے۔ ان میں سفارتکاروں کے لیے ویزا ختم کرنے، فارن سروس اکیڈمیوں کے درمیان تعاون اور خبر رساں ایجنسیوں APP اور BSS کے درمیان معاہدہ شامل ہے۔

Deputy Prime Minister and Foreign Minister, Senator Mohammad Ishaq Dar @MIshaqDar50, held wide-ranging talks with the Foreign Adviser of Bangladesh, H.E. Md. Touhid Hossain in Dhaka. Both sides reviewed entire gamut of bilateral relations, including high level exchanges , trade… pic.twitter.com/nqELdHhbjU

— Ministry of Foreign Affairs – Pakistan (@ForeignOfficePk) August 24, 2025

مزید معاہدوں میں انسٹیٹیوٹ آف اسٹریٹیجک اسٹڈیز اور بنگلہ دیشی انسٹیٹیوٹ کے درمیان تعاون، ٹریڈ ورکنگ گروپ قائم کرنے اور 2025 سے 2028 تک ثقافتی پروگرام شامل ہیں۔ یہ معاہدے دونوں ملکوں کے تعلقات کو مزید وسعت دینے میں اہم کردار ادا کریں گے۔

قبل ازیں اسحاق ڈار نے بنگلہ دیش کے کامرس ایڈوائزر شیخ بشیر الدین سے بھی ملاقات کی۔ اس ملاقات میں گورنر بنگلہ دیش بینک اور دیگر تجارتی اداروں کے سربراہان شریک تھے۔ دونوں ملکوں نے دو طرفہ تجارت، سرمایہ کاری اور اقتصادی تعاون بڑھانے پر زور دیا۔