پاکستان کی بیٹنگ ناکام، جنوبی افریقا نے پہلا ٹی ٹوئنٹی جیت لیا

راولپنڈی میں کھیلے گئے میچ میں جنوبی افریقا نے پہلے ٹی ٹوئنٹی میں پاکستان کو شکست دی اور 3 میچوں کی سیریز میں 0-1 کی برتری حاصل کرلی۔ جنوبی افریقی ٹیم نے پاکستان کو جیت کے لیے 195 رنز کا ہدف دیا، تاہم پاکستانی ٹیم 19ویں اوور میں 139 رنز بنا کر آؤٹ ہوگئی۔

جنوبی افریقا کی اننگز میں ریزا ہینڈرکس نے شاندار 60 رنز بنائے، جارج لنڈے نے 36 اور ٹونی ڈی زورزی نے 33 رنز کی مفید اننگز کھیلی۔ مہمان ٹیم نے 20 اوورز میں 9 وکٹوں کے نقصان پر 194 رنز بنائے۔ پاکستان کی جانب سے محمد نواز نے 3 وکٹیں حاصل کیں، صائم ایوب نے 2 جبکہ شاہین آفریدی، نسیم شاہ اور ابرار احمد نے ایک ایک وکٹ حاصل کی۔

پاکستان کی بیٹنگ کے دوران صائم ایوب نے 37 اور محمد نواز نے 36 رنز کے ساتھ مزاحمت کی، جبکہ صاحبزادہ فرحان نے 24 رنز بنائے۔ کپتان سلمان علی آغا صرف 2، بابر اعظم صفر، عثمان خان 12، حسن نواز 3 اور شاہین آفریدی 4 رنز بنا کر آؤٹ ہوئے۔ پاکستانی ٹیم کی بیٹنگ لائن جنوبی افریقی بولرز کے سامنے زیادہ دیر نہ ٹھہر سکی۔

مزید پڑھیں: سڈنی سکسرز کا بابر اعظم کے اعزاز میں ’بابرستان‘ فین زون بنانے کا اعلان

جنوبی افریقا کی جانب سے کاربن بوش نے بہترین بولنگ کرتے ہوئے 4 وکٹیں حاصل کیں، جارج لنڈے نے 3 اور لزاڈ ولیمز نے 2 کھلاڑیوں کو آؤٹ کیا۔ ان کی نپی تلی بولنگ نے پاکستانی بیٹرز کو سنبھلنے کا موقع نہیں دیا۔

میچ کے دوران چھاتی کے سرطان سے آگاہی مہم کے تحت پاکستانی ٹیم نے گلابی رنگ کی خصوصی کٹ پہنی، جبکہ جنوبی افریقی کھلاڑیوں اور میچ آفیشلز نے گلابی ربن لگائے۔ جنوبی افریقا نے پہلے ٹی ٹوئنٹی میں پاکستان کو شکست دی نہ صرف ایک یادگار فتح ثابت ہوئی بلکہ اس میچ نے صحت اور آگاہی کے پیغام کو بھی اجاگر کیا۔