وزیراعظم کی سعودی ولی عہد سے ملاقات میں تعاون بڑھانے پر اتفاق

سعودی عرب کے دارالحکومت ریاض میں اہم سفارتی سرگرمیاں جاری ہیں جہاں وزیراعظم کی سعودی ولی عہد سے ملاقات دو طرفہ تعلقات اور عالمی امور پر بات چیت کے لیے ہوئی۔ اس ملاقات کو دونوں ممالک کے درمیان تعلقات کو مزید مضبوط بنانے کے حوالے سے ایک بڑی پیش رفت قرار دیا جا رہا ہے۔

قصرِ یمامہ پہنچنے پر سعودی ولی عہد محمد بن سلمان نے وزیراعظم شہباز شریف اور ان کے وفد کا پرتپاک استقبال کیا۔ ملاقات کے دوران باہمی دلچسپی کے امور، تجارت اور سرمایہ کاری کے مواقع پر تفصیلی گفتگو ہوئی۔

دونوں رہنماؤں نے خطے کی تازہ صورتِ حال اور عالمی چیلنجز پر بھی تبادلہ خیال کیا۔ اس موقع پر توانائی، تجارت اور ترقیاتی منصوبوں میں تعاون بڑھانے پر اتفاق کیا گیا۔

مزید پڑھیں: وزیراعظم شہباز شریف 27 تا 29 اکتوبر کو سعودی عرب کا دورہ کریں گے

وزیراعظم شہباز شریف سعودی ولی عہد محمد بن سلمان کی خصوصی دعوت پر سعودی عرب کے دورے پر ہیں۔ ان کے اس دورے کے دوران دیگر اہم شخصیات سے بھی ملاقاتوں کا شیڈول طے کیا گیا ہے۔

ریاض میں جاری "فیوچر انویسٹمنٹ انیشی ایٹو” کی نویں کانفرنس میں وزیراعظم شرکت کریں گے جہاں وہ عالمی رہنماؤں اور بین الاقوامی اداروں کے سربراہان سے بات چیت کریں گے۔ اس دوران وزیراعظم کی سعودی ولی عہد سے ملاقات دونوں ممالک کے تعلقات کو مزید مضبوط بنانے میں اہم کردار ادا کرے گی۔