وزیراعلیٰ پنجاب مریم نواز کی سیلاب سے متاثرہ عوام سے اپیل

لاہور: وزیراعلیٰ پنجاب مریم نواز شریف نے سیلاب کے ممکنہ خطرات کے پیشِ نظر متاثرہ علاقوں کے عوام سے اپیل کی ہے کہ وہ انتظامیہ کے ساتھ بھرپور تعاون کریں اور محفوظ مقامات پر منتقل ہو جائیں۔

وزیراعلیٰ نے کہا کہ گھروں، فصلوں اور مویشیوں کے نقصانات کا تخمینہ لگایا جا رہا ہے اور حکومت سب کے نقصانات کا ازالہ کرے گی۔ ان کے مطابق اس وقت حکومت کی اولین ترجیح عوام کی جانوں کا تحفظ ہے، اس لیے شہری انتظامیہ اور ریسکیو اداروں کے ساتھ تعاون ضروری ہے۔

مریم نواز نے مزید کہا کہ مویشیوں اور املاک کے نقصانات کا شفاف تخمینہ لگا کر پنجاب کے تمام متاثرہ افراد کو ان کا حق دیا جائے گا۔ انہوں نے وعدہ کیا کہ کسی کو نظرانداز نہیں کیا جائے گا۔

وزیراعلیٰ نے عوام کو مخاطب کرتے ہوئے کہا: "خدارا اپنی اور اپنے بچوں کی زندگیوں کو ترجیح دیں اور فوری طور پر محفوظ مقامات کا رخ کریں۔”