شمالی پاکستان میں برفباری سے سردی کی شدت میں اضافہ

ملک کے بالائی علاقوں میں شمالی پاکستان میں برفباری کے باعث سردی کی شدت میں نمایاں اضافہ ہوگیا ہے۔ گلگت بلتستان اور خیبرپختونخوا کے سیاحتی مقامات برف کی چادر اوڑھ چکے ہیں جس سے موسم خوشگوار مگر سفر مشکل ہوگیا ہے۔ مقامی انتظامیہ نے لوگوں کو محتاط رہنے کی ہدایت کی ہے۔

گلگت بلتستان کے پہاڑی علاقوں میں برفباری کا سلسلہ دوبارہ شروع ہوگیا ہے۔ بابوسر، نانگا پربت اور بٹوگاہ کی چوٹیوں پر وقفے وقفے سے برفباری جاری ہے۔ برف کے باعث 12 سے زائد گاڑیاں پھنس گئیں جنہیں نکالنے کے لیے امدادی ٹیموں کو طلب کیا گیا۔

خیبرپختونخوا میں محکمہ موسمیات نے بارش اور برفباری کا الرٹ جاری کیا ہے۔ سوات، دیر اور کالام میں برفباری جبکہ اپر ہزارہ ڈویژن میں ژالہ باری اور بارش سے سردی میں اضافہ ہوا ہے۔ دن کے اوقات میں بھی ٹھنڈ کے باعث رات جیسا ماحول رہا۔

مزید پڑھیں: اے ڈی بی کا “گلیشیئرز ٹو فارمز پروگرام”، پاکستان میں پانی، زراعت اور توانائی کے تحفظ کا جامع منصوبہ

ایوبیہ، نتھیا گلی اور چھانگلہ گلی سمیت بالائی گلیات میں دو سے تین انچ تک برف پڑ چکی ہے جس سے سیاحتی مقامات مزید خوبصورت ہوگئے ہیں۔ مظفرآباد سے وادی نیلم تک بارش اور برفباری کے بعد درجہ حرارت میں نمایاں کمی آئی ہے، اور شہریوں کو غیر ضروری سفر سے گریز کی ہدایت کی گئی ہے۔

پروونشل ڈیزاسٹر منیجمنٹ اتھارٹی (پی ڈی ایم اے) کے مطابق آئندہ چند روز تک مزید بارشوں اور شمالی پاکستان میں برفباری کا امکان ہے۔ تمام ضلعی انتظامیہ کو ہدایت کی گئی ہے کہ وہ الرٹ رہیں اور کسی بھی ہنگامی صورتِ حال میں فوری کارروائی کے لیے تیار رہیں۔