وزیر اعظم شہباز شریف نے بجلی کی قیمتوں میں کمی کا اعلان کر دیا

اسلام آباد: وزیر اعظم شہباز شریف نے گھریلو اور صنعتی صارفین کیلئے بجلی کی قیمتوں میں کمی کا اعلان کر دیا۔

بجلی کی قیمتوں میں کمی کی تقریب سے خطاب کرتے ہوئے وزیر اعظم شہباز شریف نے گھریلوں صارفین کیلئے 7 روپے 41 پیسے فی یونٹ کمی کا اعلان کیا ہے۔ صنعتوں کیلئے بجلی کی قیمتوں میں 7روپے 59 پیسے فی یونٹ کمی کی گئی ہے۔ جس کے بعد گھریلو صارفین کو بجلی 34 روپے فی یونٹ ملے گی جبکہ صنعتی صارفین کو بجلی کی قیمت 48 روپے فی یونٹ ملے گی۔

انہوں نے کہا تھا کہ بجلی کی قیمتوں میں خاطر خواہ کمی ہونے تک ہماری ایکسپورٹ ترقی نہیں کر سکتی۔ اس لیے اس کی قیمتوں میں کمی کا اعلان کیا ہے۔

شہباز شریف نے کہا کہ معاشی میدان میں آگے بڑھتے ہوتے ماضی پر نظر ڈالنا بھی اہم ہے۔ ہم نے پُر خطر اور دشوار گزار سفر کا مقابلہ کیا ہے۔ پاکستان پر دیوالیہ پن کی تلوار لٹک رہی تھی۔ عدم استحکام عروج پر تھا، آئی ایم ایف بات سننے کو تیار نہیں تھا۔ بنیادی ضروریات کی امپورٹ کیلئے ایل سی کھولنے کیلئے پیسے نہیں تھے۔

انہوں نے کہا کہ انتشاری ٹولے کا پختہ یقین تھا کہ ملک دیوالیہ ہوجائے گا۔ اس ٹولے نے ملکی مفادات کو نقصان پہنچانے کیلئے تمام حدیں پار کیں۔ معیشت کے استحکام کیلئے کاوشوں کی راہ میں ان عناصر نے بھاری رکاوٹیں کھڑی کیں۔ ذاتی مفاد اور سیاست کیلئے اس ٹولے نے ریاست کے ساتھ کھلواڑ کیا۔ آئی ایم ایف پروگرام میں رکاوٹیں ڈالنے کی بھی کوشش کی گئیں۔

شہباز شریف نے کہا کہ اللہ کے فضل سے محنت رنگ لائی اور ملک دیوالیہ ہونے سے بچ گیا۔ جو وعدہ کیا تھا وہ پورا ہونے جا رہا ہے۔ حکومت نے پچھلے ایک سال میں پیٹرول کی قیمت میں 38 روپے کمی کی ہے۔ شرح سود آج 12 فیصد تک آچکی ہے۔ مہنگائی سنگل ڈیجٹ پر آگئی ہے۔