مشرق وسطیٰ کی کشیدگی کے باعث پاکستان اسٹاک ایکسچینج میں شدید مندی

پاکستان اسٹاک ایکسچینج (PSX) میں پیر کے روز شدید مندی دیکھنے میں آئی، جب سرمایہ کار امریکا کے ایران کے جوہری مراکز پر حملوں کے بعد ممکنہ ایرانی ردعمل کے حوالے سے بے چینی کا شکار رہے۔ مشرق وسطیٰ میں بڑھتی ہوئی کشیدگی کے باعث عالمی اقتصادی سرگرمیوں اور افراط زر کے خطرات میں اضافہ ہو گیا ہے۔

کاروباری دن کے دوران کے ایس ای-100 انڈیکس 1,300 پوائنٹس کی بڑی کمی کے ساتھ 118,700 پوائنٹس تک گر گیا۔ یہ شدید مندی جمعہ کے روز کی مثبت کارکردگی کے بعد سامنے آئی، جب انڈیکس 20.65 پوائنٹس کے اضافے کے ساتھ 120,023.24 پوائنٹس پر بند ہوا تھا۔

دوسری جانب، عالمی منڈی میں خام تیل کی قیمتوں میں بھی تیزی دیکھنے میں آئی۔ پیر کو برینٹ کروڈ کی قیمت 1.52 ڈالر یا 1.97 فیصد اضافے کے ساتھ 78.53 ڈالر فی بیرل تک پہنچ گئی، جبکہ امریکی ویسٹ ٹیکساس انٹرمیڈیٹ (WTI) کروڈ 1.51 ڈالر یا 2.04 فیصد اضافے کے ساتھ 75.35 ڈالر فی بیرل تک جا پہنچا۔ کاروبار کے آغاز میں دونوں تیل کے سودے 3 فیصد سے زائد بڑھ کر پانچ ماہ کی بلند ترین سطح تک پہنچے تھے۔

تیل کی قیمتوں میں یہ اضافہ اس وقت سامنے آیا جب امریکی صدر ڈونلڈ ٹرمپ نے تصدیق کی کہ انہوں نے اسرائیل کے ساتھ مل کر ایران کے اہم جوہری مراکز کو شدید نقصان پہنچایا ہے۔ ایران کی جانب سے جوابی کارروائی کی دھمکی کے بعد مشرق وسطیٰ میں تنازع مزید سنگین ہو گیا ہے، جس نے عالمی مالیاتی منڈیوں میں بے یقینی پیدا کر دی ہے۔