پاکستان نے تیسرے ون ڈے میں شکست دیکر جنوبی افریقہ کو پہلی بار وائٹ واش کردیا

جوہانسبرگ: پاکستان نے جنوبی افریقہ کو تیسرے اور آخری ون ڈے میچ میں ڈی ایل ایس میتھڈ کے تحت 36 رنز سے شکست دے کر سیریز 0-3 سے اپنے نام کر لی۔

پاکستان نے پہلے بیٹنگ کرتے ہوئے 47 اوورز میں 9 وکٹوں کے نقصان پر 308 رنز بنائے۔ صائم ایوب 101 رنز کے ساتھ نمایاں بیٹسمین رہے، جنہوں نے دو چھکوں اور 13 چوکوں کی مدد سے اپنی سنچری مکمل کی۔ یہ ان کی جنوبی افریقا کے خلاف دوسری اور مجموعی طور پر تیسری سنچری تھی۔

پاکستان کا آغاز اچھا نہیں رہا، عبداللہ شفیق بغیر کوئی رن بنائے 1 کے مجموعی اسکور پر پویلین لوٹ گئے، تاہم صائم ایوب اور بابر اعظم نے ذمہ دارانہ بیٹنگ کرتے ہوئے اسکور کو آگے بڑھایا۔ بابر اعظم 52 رنز بنا کر آؤٹ ہوئے۔ اس کے بعد کپتان محمد رضوان نے 53 رنز اور نائب کپتان سلمان آغا نے 48 رنز بنائے، جبکہ طیب طاہر نے 28 اور محمد حسنین نے 4 رنز بنائے۔ کامران غلام اور شاہین شاہ آفریدی بغیر کوئی رن بنائے آؤٹ ہوگئے۔

جنوبی افریقا کے گیندباز ربادا نے 3 وکٹیں حاصل کیں، جینسین اور فوچیون نے 2،2 وکٹیں لیں، جبکہ کوربن بوش اور مپ ہاکا نے ایک ایک وکٹ حاصل کی۔

قبل ازیں، جوہانسبرگ میں تیسرے اور آخری ون ڈے میچ میں جنوبی افریقہ کے کپتان ٹیمبا بووما نے ٹاس جیت کر پاکستان کو بیٹنگ کی دعوت دی۔ بارش کے باعث دونوں اننگز کو 47 اوورز تک محدود کر دیا گیا۔

جنوبی افریقا کی پوری ٹیم 42 اوورز میں 271 رنز بنا کر آؤٹ ہوگئی۔ ہیزچ کلاسن 81 رنز کے ساتھ جنوبی افریقا کے ٹاپ اسکورر رہے۔

پاکستان کی جانب سے شاہین شاہ آفریدی اور نسیم شاہ نے 2،2 وکٹیں حاصل کیں، محمد حسنین اور صائم ایوب نے ایک ایک وکٹ لی، جبکہ سفیان مقیم نے 4 کھلاڑیوں کو پویلین کی راہ دکھائی۔

صائم ایوب کو میچ اور سیریز کا بہترین کھلاڑی قرار دیا گیا۔