پولیس کا پی ٹی آئی کے چیف وہپ عامر ڈوگر پر مبینہ تشدد

راولپنڈی: پولیس کا پی ٹی آئی کے چیف وہپ عامر ڈوگر پر مبینہ تشدد، عامر ڈوگر نے بتایا کہ پولیس نے اُن کے کپڑے پھاڑے اور ڈنڈے مارے۔

میڈیا سے گفتگو کرتے ہوئے چیف وہپ نے کہا کہ یہ پولیس گردی اور غنڈہ گردی کی انتہا ہے، میں ممبر قومی اسمبلی ہوں یہ دیکھیں کیا ہورہا ہے۔ تمام ارکان پارلیمنٹ پر لاٹھیاں اور بہیمانہ تشدد کیا گیا، جیسے ہم کوئی چور یا عادی مجرم ہوں، لاٹھیاں مار مار کر توڑ دی گئیں۔

انہوں نے کہا کہ خواتین پر بھی تشدد کیا جا رہا ہے، یہاں جمہوریت کو دفن کر دیا گیا ہے۔ کیا قصور ہے اس عوام کا جنہوں نے لاکھوں ووٹ دے کر ہمیں قومی اسمبلی بھجوایا، میری جیت بانی پی ٹی آئی کے نظریے کی جیت تھی، یہ لاٹھیاں ،مقدمے ہمیں اپنے مقصد سے پیچھے نہیں ہٹا سکتے۔

عامر ڈوگر نے مزید کہا کہ جب تک بانی پی ٹی آئی رہا نہیں ہوتے ہم یہ جاری رکھیں گے، ہم اس وقت موجودہ جعلی پارلیمنٹ کے سامنے بیٹھے ہیں، ہماری قیادت یہاں موجود ہے اور ہم دھرنا دے کر بیٹھے ہیں۔