پی ایس ایل 10: ملتان سلطانز نے لاہور قلندرز کو جیت کیلئے 186 رنز کا ہدف دیدیا

لاہور: پی ایس ایل 10 کے 16ویں میچ میں ملتان سلطانز نے لاہور قلندرز کو 186 رنز کا ہدف دے دیا۔

قذافی اسٹیڈیم میں کھیلے گئے میچ میں ملتان نے مقررہ 20 اوورز میں 3 وکٹوں کے نقصان پر 185 رنز بنائے۔ کپتان محمد رضوان 76 اور کامران غلام 52 رنز کے ساتھ نمایاں رہے۔ دیگر بلے بازوں میں یاسر خان نے 24، عثمان خان نے 18 اور شائے ہوپ نے 9 رنز بنائے۔

لاہور کی جانب سے ٹام کرن، حارث رؤف اور ڈیرل مچل نے ایک، ایک وکٹ حاصل کی۔ شاہین آفریدی نے ٹاس جیت کر ملتان کو بیٹنگ کی دعوت دی تھی۔

میچ میں محمد نعیم لاہور کی ٹیم میں واپس آئے جبکہ ٹام کرن نے ڈیبیو کیا۔ ملتان نے اپنی الیون میں تین تبدیلیاں کیں، عاکف جاوید، محمد حسنین اور شائے ہوپ کو شامل کیا گیا۔

اب تک ٹورنامنٹ میں ملتان نے 5 میچز میں سے صرف ایک جیتا (وہ بھی لاہور کے خلاف)، جبکہ لاہور تیسرے اور ملتان آخری نمبر پر ہے۔ ہیڈ ٹو ہیڈ مقابلوں میں ملتان کو 11 اور لاہور کو 9 فتوحات حاصل ہیں۔

گزشتہ روز کے میچ میں کوئٹہ گلیڈی ایٹرز نے کراچی کنگز کو 5 رنز سے شکست دی تھی۔