لاہور میں گلبرگ پولیس نے پاکستان سپر لیگ (پی ایس ایل) کے جعلی میچ ٹکٹس فروخت کرنے والے دو ملزمان کو رنگے ہاتھوں گرفتار کر لیا۔ یہ کارروائی ایس پی اخلاق اللہ تارڑ کی نگرانی میں کی گئی۔
ایس ایچ او گلبرگ تیمور عباس خان کے مطابق، گرفتار ملزمان ایاز احمد اور عبدالتواب خود کو ٹی سی ایس کے ملازمین ظاہر کر کے شہریوں کو جعلی ٹکٹس فروخت کر رہے تھے۔ پولیس نے ملزمان کو قذافی اسٹیڈیم کے مختلف گیٹس سے گرفتار کیا۔
رپورٹس کے مطابق، ملزم عبدالتواب کو گیٹ نمبر 15 جبکہ ایاز احمد کو فیفا گیٹ سے جعلی ٹکٹس فروخت کرتے ہوئے پکڑا گیا۔ پولیس نے ملزمان کے قبضے سے بڑی تعداد میں جعلی میچ ٹکٹس برآمد کر لی ہیں، جنہیں وہ عوام میں فروخت کرنے کی کوشش کر رہے تھے۔
ایس ایچ او گلبرگ تیمور عباس خان نے بتایا کہ گرفتار ملزمان کے خلاف مقدمات درج کر لیے گئے ہیں اور ان سے مزید تحقیقات کا آغاز کر دیا گیا ہے۔ انہوں نے کہا کہ پولیس جعلی ٹکٹس فروخت کرنے والوں کے خلاف سخت کارروائی جاری رکھے گی تاکہ شہریوں کو نقصان سے بچایا جا سکے۔
ڈی آئی جی آپریشنز لاہور محمد فیصل کامران نے اس کارروائی کی تعریف کرتے ہوئے کہا کہ میچ کی سیکیورٹی کے ساتھ ساتھ جعلی ٹکٹس کے کاروبار کو روکنے کے لیے پولیس کی کارروائیاں جاری رہیں گی۔
