پاکستان کا سندھ طاس معاہدے کی معطلی پر بھارت کو نوٹس دینے کا فیصلہ

لاہور: بھارت کی جانب سے سندھ طاس معاہدے کی یکطرفہ معطلی پر پاکستان نے باقاعدہ سفارتی نوٹس دینے کا فیصلہ کر لیا ہے۔

ذرائع کے مطابق وزارتِ خارجہ، آبی وسائل اور قانون نے ابتدائی قانونی مشاورت مکمل کر لی ہے، اور چند روز میں بھارت کو نوٹس جاری کیا جائے گا۔ نوٹس میں بھارت سے معاہدے کی معطلی کی قانونی وجوہات طلب کی جائیں گی۔

ذرائع کا کہنا ہے کہ پاکستان عالمی فورمز پر بھارت کی آبی جارحیت کے خلاف مؤثر آواز اٹھانے کی تیاری کر رہا ہے، جبکہ تمام اقدامات حکومت اور کابینہ کی منظوری سے کیے جائیں گے۔

انڈس کمیشن کے مطابق سندھ طاس معاہدے پر پاکستان کو قانونی برتری حاصل ہے، اور بھارت کو اپنے فیصلے پر نظرِ ثانی کرنا پڑے گی۔

یاد رہے کہ 22 اپریل کو مقبوضہ کشمیر کے علاقے پہلگام میں فائرنگ سے 26 افراد ہلاک ہوئے، جس کے بعد بھارت نے ثبوت کے بغیر پاکستان پر الزام لگاتے ہوئے سندھ طاس معاہدہ معطل کر دیا تھا۔

وزیراعظم شہباز شریف نے واقعے کی مذمت کرتے ہوئے غیرجانبدار تحقیقات کی پیشکش کی ہے، جبکہ سیاسی و عسکری قیادت نے واضح کیا ہے کہ کسی بھی بھارتی مہم جوئی کا بھرپور جواب دیا جائے گا۔