پاکستان اور عالمی مارکیٹ میں سونے کی قیمتوں میں کمی

پاکستان اور عالمی مارکیٹ میں سونے کی قیمتوں میں مسلسل اضافے کے بعد حالیہ دنوں میں کمی دیکھنے کو ملی ہے، جس کے باعث ملک میں سونا سستا ہو رہا ہے۔

آل پاکستان جیمز اینڈ جیولرز ایسوسی ایشن کے مطابق عالمی مارکیٹ میں سونے کی قیمت میں نمایاں کمی آئی ہے، جس کا اثر پاکستان کی مارکیٹ پر بھی پڑا ہے۔ عالمی سطح پر سونے کی قیمت میں گراوٹ کے بعد پاکستان میں فی تولہ سونے کی قیمت میں 3400 روپے کی کمی ہوئی، جس کے بعد سونا 3 لاکھ 45 ہزار 800 روپے فی تولہ پر آگیا ہے۔

ایسوسی ایشن کے مطابق 10 گرام سونے کی قیمت 2915 روپے کم ہو کر 2 لاکھ 96 ہزار 467 روپے ہو گئی ہے۔ عالمی مارکیٹ میں سونا 34 ڈالر کمی کے بعد 3276 ڈالر فی اونس کا ہو گیا ہے۔

یاد رہے کہ گزشتہ روز عالمی مارکیٹ میں سونے کی قیمت میں 21 ڈالر کا اضافہ ہوا تھا، جس کے بعد پاکستان میں سونا 2100 روپے مہنگا ہو کر 3 لاکھ 49 ہزار 200 روپے فی تولہ ہوگیا تھا۔