پاکستانی اداکارہ فائزہ حسن نے کہا ہے کہ والدین کو اپنے بچوں کی تربیت پر خاص توجہ دینی چاہیے اور انہیں صحیح اور غلط کے بارے میں آگاہ کرنا چاہیے۔ ایک انٹرویو میں بات کرتے ہوئے انہوں نے کہا کہ والدین کو چاہیے کہ وہ بچوں کو سمجھائیں کہ ایکسٹرا میریٹل افیئر غلط عمل ہے اور اس کے معاشرے اور خاندان پر منفی اثرات پڑتے ہیں۔ ان کے مطابق نئی نسل کو اخلاقی اقدار کے بارے میں بروقت آگاہ کرنا بہت ضروری ہے۔
اداکارہ نے انٹرویو کے دوران جنریشن زی (Gen Z) کی پرورش اور نئی نسل کے رویوں کے بارے میں بھی گفتگو کی۔ ان سے سوال کیا گیا کہ کیا بچوں کو دھوکا دہی اور شادی کے بعد دوسرے تعلقات کے بارے میں بتایا جانا چاہیے۔ اس پر فائزہ حسن کا کہنا تھا کہ بچوں کو یہ بات نرم اور سمجھدار انداز میں بتائی جا سکتی ہے۔
ان کا کہنا تھا کہ بچوں کو سیدھا لیکچر دینے کے بجائے عملی مثالوں کے ذریعے سمجھانا زیادہ مؤثر ہوتا ہے۔ اگر کسی خبر یا ڈرامے میں اس طرح کا موضوع سامنے آئے تو والدین اس موقع پر بچوں کو بتا سکتے ہیں کہ دھوکا دینا اور بے وفائی کرنا درست عمل نہیں ہے۔
مزید پڑھیں: بادشاہ نے متنازع گانے پر معافی مانگ لی، ویڈیو ڈیلیٹ کرنے کا اعلان
فائزہ حسن نے کم عمری میں شادی کے بارے میں بھی اپنے خیالات کا اظہار کیا۔ انہوں نے کہا کہ کم عمر میں شادی کرنا کوئی غلط بات نہیں، لیکن نوجوانوں کو پہلے اپنی تعلیم، کیریئر اور مستقبل کے بارے میں سوچنا چاہیے۔ ان کے مطابق مالی طور پر خود مختار ہونا زندگی کے اہم فیصلوں کے لیے ضروری ہے۔
اداکارہ نے مزید کہا کہ نوجوانوں کو جلد بازی میں شادی کرنے کے بجائے پہلے خود کو مضبوط اور مستحکم بنانا چاہیے۔ ان کا کہنا تھا کہ والدین کی ذمہ داری ہے کہ وہ بچوں کو زندگی کے اہم اصول سمجھائیں اور بتائیں کہ ایکسٹرا میریٹل افیئر غلط عمل ہے تاکہ نئی نسل بہتر فیصلے کر سکے۔
