معروف گلوکار اور ٹی وی میزبان فخر عالم کے گھر چوری کی واردات

معروف گلوکار اور ٹی وی میزبان فخر عالم کے گھر چوری کی واردات، واقعہ کے وقت ان کے اہل خانہ گھر پر موجود نہیں تھے۔
چوکیدار کے مطابق یہ ڈکیتی منگل اور بدھ کی درمیانی شب ہوئی، چوروں نے گھر میں گھسنے سے پہلے میرے کھانے میں نشہ ملا دیا تھا۔ ملزمان نے لاکر توڑنے کی کوشش کی لیکن ناکام رہے۔ پولیس نے جائے وقوعہ پر پہنچ کر شواہد اکٹھے کرنے کے لیے کرائم سین یونٹ کو طلب کر لیا۔ مسروقہ سامان کی کل مالیت کا تعین ہونا باقی ہے۔
فخر عالم نے سوشل میڈیا پر ایک پوسٹ کرکے بدھ کی رات کو بتایا کہ کراچی میں میرا گھر لوٹ لیا گیا ہے۔ انہوں نے گھر میں ڈکیتی کے واقعے پر تشویش کا اظہار کرتے ہوئے امید ظاہر کی کہ پولیس ملزمان کو گرفتار کر لے گی۔
انہوں نے لکھامجھے چیزوں سے کوئی فرق نہیں پڑتا لیکن ذہنی سکون انمول ہے۔ یہاں اصل نقصان یہی ہے۔
دریں اثناء ڈی آئی جی ساؤتھ اسد رضا نے کہا کہ گلوکار فخر عالم کے گھر میں گھسنے کی کوشش کی گئی جو آج کل ملک سے باہر ہیں۔
پولیس نے کہا کہ بظاہر گھر سے کچھ بھی نہیں اٹھایا گیا۔ ڈی آئی جی نے بتایا کہ بنگلے کے سیکیورٹی گارڈ کو زہر دیا گیا، گھر کا لاکر محفوظ ہے۔