فیلڈ مارشل سید عاصم منیر کی اردن کے شاہ عبداللہ دوم سے ملاقات

آرمی چیف فیلڈ مارشل سید عاصم منیر نے اردن کے شاہ عبداللہ دوم سے عمان میں اہم ملاقات کی۔ اس موقع پر اردن کے ولی عہد شہزادہ حسین بن عبداللہ بھی شریک تھے۔

پاک فوج کے شعبہ تعلقات عامہ (آئی ایس پی آر) کے مطابق، ملاقات میں پاکستان اور اردن کے درمیان دفاعی اور سیکیورٹی تعاون بڑھانے پر اتفاق کیا گیا۔ آرمی چیف نے پاکستانی عوام، حکومت اور مسلح افواج کی جانب سے نیک تمنائیں بھی پہنچائیں۔

شاہ عبداللہ دوم نے پاکستان آرمی کی پیشہ ورانہ صلاحیتوں اور خطے میں امن و استحکام کے لیے کردار کو سراہا۔

مزید برآں، فیلڈ مارشل سید عاصم منیر نے اردنی جوائنٹ چیفس آف اسٹاف میجر جنرل یوسف احمد الحنیتی سے بھی ملاقات کی۔ عمان کے جنرل ہیڈکوارٹرز پہنچنے پر انہیں گارڈ آف آنر پیش کیا گیا۔

ملاقات میں دونوں ممالک کی افواج کے تاریخی تعلقات پر اطمینان کا اظہار کیا گیا، جبکہ میجر جنرل الحنیتی نے پاکستان آرمی کے علاقائی امن کے لیے کردار کو خراجِ تحسین پیش کیا۔

آئی ایس پی آر کے مطابق، دونوں ممالک نے اس عزم کا اعادہ کیا کہ دفاعی و سیکیورٹی تعاون کو مزید فروغ دیا جائے گا۔