ہالی ووڈ کے ایک ہزار سے زائد فنکاروں کا اسرائیلی فلمی اداروں کے بائیکاٹ کا اعلان

ہالی ووڈ کے ایک ہزار سے زیادہ اداکاروں، ہدایتکاروں اور تخلیقی شخصیات نے اسرائیلی فلمی اداروں کا بائیکاٹ کرنے کا اعلان کیا ہے۔

اس اقدام کا مقصد ان اداروں سے کسی بھی قسم کا تعاون ختم کرنا ہے جو فلسطینیوں کے خلاف جاری کارروائیوں اور انسانی حقوق کی مبینہ خلاف ورزیوں میں ملوث سمجھے جاتے ہیں۔

بین الاقوامی میڈیا کے مطابق یہ فیصلہ ایک اجتماعی حلف نامے کے ذریعے سامنے آیا ہے، جس پر کئی نمایاں شخصیات نے دستخط کیے ہیں۔

دستخط کنندگان میں آسکر ایوارڈ یافتہ اداکارہ اولیویا کولمین، ہدایتکارہ آوا ڈو ورنے، معروف اداکارہ ٹلڈا سوئنٹن، مارول فلموں کے اداکار مارک روفیلّو اور ہدایتکار ایڈم مکائے شامل ہیں۔

حلف نامے میں کہا گیا ہے کہ یہ فنکار اور فلمی کارکنان ایسے کسی بھی منصوبے کا حصہ نہیں بنیں گے جو فلسطینی عوام کے خلاف جبر یا نسل کشی جیسے اقدامات کی حمایت یا مدد کرتا ہو۔