پاکستان ڈیجیٹل سرمایہ کاری کے لیے پرکشش مرکز بنتا جا رہا ہے، اسحاق ڈار

نائب وزیراعظم اور وزیر خارجہ اسحاق ڈار نے کہا ہے کہ ملک تیزی سے ڈیجیٹل سرمایہ کاری کے لیے ایک پرکشش مقام بنتا جا رہا ہے۔

انہوں نے پاکستان ڈیجیٹل اکنامک سینٹر کے اجرا کی تقریب سے خطاب کرتے ہوئے معیشت میں ڈیجیٹل تبدیلی کی اہمیت پر زور دیا۔

اسحاق ڈار نے کہا کہ پاکستان اور چین نے روابط اور انفراسٹرکچر سمیت مختلف شعبوں میں مشترکہ اقدامات کیے ہیں جو اقتصادی ترقی میں اہم کردار ادا کر رہے ہیں۔

انہوں نے مزید کہا کہ دونوں ممالک کی قیادت مل کر ترقی کی نئی منازل طے کر رہی ہے اور چین حقیقی معنوں میں ڈیجیٹل راہداری قائم کر رہا ہے۔

ان کے مطابق پاک چین ڈیجیٹل راہداری سے تعاون میں اضافہ ہوگا اور روزگار کے نئے مواقع پیدا ہوں گے۔

انہوں نے بتایا کہ تعلیم، صحت اور موسمیاتی تبدیلی جیسے اہم شعبوں میں بھی چین کے ساتھ مل کر کام کیا جا رہا ہے جبکہ نوجوانوں کو جدید تقاضوں سے ہم آہنگ کیا جا رہا ہے۔

آخر میں انہوں نے کہا کہ پاکستان کی ڈیجیٹل معیشت تیزی سے ترقی کر رہی ہے جس کے باعث ملک عالمی سرمایہ کاروں کے لیے مزید پرکشش بنتا جا رہا ہے۔