پاکستان ٹیم کی اسٹیڈیم روانگی روک دی گئی

پاکستان کرکٹ ٹیم کو ایشیا کپ کے میچ کے لیے ہوٹل سے اسٹیڈیم جانے سے روک دیا گیا ہے۔ ذرائع کے مطابق یہ فیصلہ ایک تنازع کی وجہ سے کیا گیا ہے جو ریفری اینڈی پائی کرافٹ کے رویے کے بعد پیدا ہوا۔

ذرائع کا کہنا ہے کہ اگر ریفری اینڈی پائی کرافٹ معافی مانگ لیں تو پاکستان ٹیم یو اے ای کے خلاف آج کا میچ کھیلنے پر غور کر سکتی ہے۔ اس وقت کھلاڑی ہوٹل میں موجود ہیں اور انتظامیہ کے ساتھ مشورہ جاری ہے۔

پاکستان کرکٹ بورڈ نے ریفری کو تبدیل کرنے کے لیے آئی سی سی کو خط لکھا ہے، لیکن اب تک کوئی جواب نہیں ملا۔ بورڈ کا کہنا ہے کہ جب تک تصدیق نہیں ہوتی، ٹیم اسٹیڈیم نہیں جائے گی۔

چیئرمین پی سی بی محسن نقوی اس صورتحال پر قریبی نظر رکھے ہوئے ہیں۔ وہ مسلسل پی سی بی حکام سے رابطے میں ہیں اور ٹیم کی روانگی آئی سی سی کے جواب سے مشروط ہے۔

یہ تنازع اس وقت شروع ہوا جب پاک بھارت میچ کے دوران ٹاس کے وقت ریفری نے پاکستانی کپتان سے ہاتھ ملانے سے منع کیا۔ ریفری نے میڈیا سے بھی کہا کہ یہ سب ریکارڈ نہ کیا جائے۔ میچ کے بعد پی سی بی نے احتجاج کیا اور کہا کہ اگر ریفری کو تبدیل نہ کیا گیا تو پاکستان ایشیا کپ کے باقی میچز نہیں کھیلے گا۔