پاکستان اور امریکا کا انسدادِ دہشتگردی کیلئے معلومات کے تبادلے پر اتفاق

اسلام آباد میں 15 اگست 2025 کو وفاقی وزیر داخلہ محسن نقوی سے امریکی کوآرڈینیٹر برائے انسداد دہشتگردی گریگوری لوگرفو نے ملاقات کی۔

ملاقات میں پاک-امریکا تعلقات، انسدادِ دہشتگردی حکمتِ عملی اور بارڈر سکیورٹی پر بات چیت ہوئی۔ دونوں ممالک نے انسدادِ منشیات سمیت مختلف شعبوں میں تعاون بڑھانے اور معلومات کے تبادلے کو مزید مؤثر بنانے پر اتفاق کیا۔

ملاقات میں وزیرِ مملکت طلال چوہدری، قائم مقام امریکی سفیر نیٹلی بیکر اور دیگر حکام بھی شریک تھے۔ محسن نقوی نے کہا کہ صدر ٹرمپ کی حکومت کے بعد پاک-امریکا تعلقات میں نمایاں بہتری آئی ہے۔ انہوں نے شفافیت، باہمی اعتماد اور تعاون کو تعلقات کا بنیادی ستون قرار دیا اور کہا کہ یہ ہر شعبے میں تعلقات کو فروغ دینے کا بہترین وقت ہے۔

وزیر داخلہ نے امریکا کی جانب سے کالعدم بی ایل اے اور مجید بریگیڈ کو عالمی دہشتگرد تنظیمیں قرار دینے کے اقدام کو سراہا۔ انہوں نے کہا کہ انسدادِ دہشتگردی کے لیے پاک-امریکا تعاون مثبت نتائج دے گا۔ مزید کہا کہ ڈائیلاگ سے مشترکہ لائحہ عمل بنانے میں مدد ملے گی۔

گریگوری لوگرفو نے پاکستان میں دہشتگرد حملوں میں جانی نقصان پر افسوس کا اظہار کیا۔ انہوں نے کہا کہ پاکستان جغرافیائی اعتبار سے نہایت اہم ملک ہے اور اس کی قربانیوں کو تسلیم کیا جاتا ہے۔

دونوں ممالک نے اس بات پر اتفاق کیا کہ انسدادِ دہشتگردی تعاون کو مزید مضبوط بنایا جائے گا۔ ملاقات مثبت ماحول میں ختم ہوئی اور آئندہ مشترکہ اقدامات کی امید ظاہر کی گئی۔