عدالت نے علی امین گنڈا پور کے ناقابلِ ضمانت وارنٹ گرفتاری جاری کردیے

اسلام آباد کی ڈسٹرکٹ اینڈ سیشن کورٹ نے خیبرپختونخوا کے سابق وزیراعلیٰ علی امین گنڈا پور کے خلاف جاری شراب و اسلحہ برآمدگی کیس میں ناقابلِ ضمانت وارنٹ گرفتاری جاری کردیے۔

تفصیلات کے مطابق، جوڈیشل مجسٹریٹ مبشر حسن نے مقدمے کی سماعت کی۔ کیس کال ہونے کے باوجود علی امین گنڈا پور عدالت میں پیش نہیں ہوئے، جس پر عدالت نے ان کی مسلسل غیرحاضری پر برہمی کا اظہار کرتے ہوئے وارنٹ گرفتاری جاری کرنے کا حکم دیا۔

یہ بھی پڑھیں : علی امین گنڈاپور ریلی سے خطاب کیے بغیر روانہ، کارکنان مشتعل

عدالت نے پولیس کو ہدایت کی ہے کہ علی امین گنڈا پور کو گرفتار کر کے آئندہ سماعت پر پیش کیا جائے، جبکہ مقدمے کی اگلی سماعت 28 اکتوبر تک ملتوی کر دی گئی ہے۔

واضح رہے کہ شراب و اسلحہ برآمدگی کا مقدمہ علی امین گنڈا پور کے خلاف اسلام آباد کے تھانہ بارہ کہو میں درج ہے۔

یہ بھی پڑھیں : گورنر پختونخوا نے علی امین گنڈا پور کا استعفیٰ دستخط پر اعتراض

خیبرپختونخوا کے گورنر فیصل کریم کنڈی نے وزیراعلیٰ علی امین گنڈا پور کا استعفیٰ منظور نہیں کیا اور دستخطوں میں فرق کی بنیاد پر اعتراض لگا کر واپس کر دیا۔

گورنر نے کہا کہ علی امین کی جانب سے دیے گئے دونوں استعفوں پر موجود دستخط ایک جیسے نہیں ہیں، اس لیے ان کی تصدیق ضروری ہے۔ اس سلسلے میں گورنر نے علی امین کو 15 اکتوبر دوپہر 3 بجے گورنر ہاؤس میں طلب کر لیا ہے۔

یاد رہے کہ آج خیبرپختونخوا اسمبلی میں نئے قائد ایوان کا انتخاب ہونے جا رہا ہے۔ اس مقصد کے لیے چار امیدواروں کے کاغذات نامزدگی منظور کیے گئے ہیں۔