پنجاب میں 27 سہولت بازار جولائی تک مکمل کرنے کا ہدف مقرر

وزیراعلیٰ پنجاب مریم نواز شریف نے صوبے بھر میں 27 نئے سہولت بازاروں کی تکمیل کے لیے جولائی کی ڈیڈ لائن مقرر کر دی ہے۔ یہ اعلان انہوں نے آج لاہور میں ایک اجلاس کی صدارت کے دوران کیا۔

اجلاس کو بریفنگ میں بتایا گیا کہ مختلف اضلاع میں مزید 13 “سہولت آن دی گو” مارکیٹس بھی قائم کی جائیں گی تاکہ عوام کو روزمرہ اشیاء آسان اور سستے نرخوں پر دستیاب ہو سکیں۔

حکام کے مطابق اس منصوبے کے تحت تقریباً 1300 نئے کاروبار قائم ہوں گے جبکہ 600 سے زائد براہ راست روزگار کے مواقع پیدا ہوں گے۔ اس سے سالانہ 9 کروڑ سے زائد افراد کو فائدہ پہنچنے کی توقع ہے۔

متحدہ عرب امارات کے قریب ٹینکر پر حملہ، عملہ محفوظ

اجلاس میں بتایا گیا کہ دکانداروں کو مفت بجلی اور صفائی کی سہولیات فراہم کی جائیں گی، جبکہ مرکزی سی سی ٹی وی نگرانی کے نظام کے باعث سکیورٹی پر سالانہ تقریباً 5 کروڑ 30 لاکھ روپے کی بچت ہوگی۔

وزیراعلیٰ پنجاب نے کہا کہ اس منصوبے کا مقصد شہریوں کو صاف ستھرے، خاندانی ماحول میں معیاری اور سستی اشیاء کی فراہمی یقینی بنانا ہے۔ ان کا کہنا تھا کہ حکومت عوامی سہولت کے منصوبوں کو تیزی سے مکمل کرنے کے لیے پرعزم ہے۔

حکام کے مطابق سہولت بازاروں کے قیام سے نہ صرف مقامی معیشت کو فروغ ملے گا بلکہ چھوٹے کاروباروں کو بھی ترقی کے بہتر مواقع حاصل ہوں گے۔