سابق کپتان کا کرکٹ چھوڑنے کا اعلان؟

پاکستان ویمن کرکٹ ٹیم کی سابق کپتان اور مایہ ناز آل راؤنڈر ندا ڈار نے ذہنی صحت کے مسائل کے باعث کرکٹ سے عارضی طور پر کنارہ کشی اختیار کرنے کا اعلان کیا ہے۔

ندا ڈار نے اپنے بیان میں کہا کہ حالیہ ذاتی اور پیشہ ورانہ حالات نے ان کی ذہنی صحت پر گہرا اثر ڈالا ہے۔ انہوں نے کہا:
"گزشتہ چند ماہ میں میری ذاتی اور پیشہ ورانہ زندگی میں کئی واقعات پیش آئے جنہوں نے میری ذہنی صحت کو متاثر کیا۔ اسی لیے میں نے فیصلہ کیا ہے کہ کرکٹ سے کچھ وقت کے لیے وقفہ لوں تاکہ خود پر توجہ دے سکوں۔ اس دوران میری پرائیویسی کا احترام کیا جائے۔”

ندا حال ہی میں آئی سی سی ویمنز کرکٹ ورلڈ کپ کوالیفائر کی تیاری کے لیے فیصل آباد میں ٹریننگ کیمپ کا حصہ تھیں، جہاں فٹنس ٹیسٹ کے بعد انہیں اسکواڈ میں شامل نہیں کیا گیا۔ اس کے علاوہ وہ نیشنل ٹی ٹوئنٹی کپ میں بھی شرکت نہیں کریں گی، اور فی الحال کھیل سے کنارہ کشی اختیار کر رہی ہیں۔

ندا ڈار کو پاکستان کی ٹی ٹوئنٹی تاریخ کی سب سے زیادہ میچز کھیلنے والی کھلاڑی ہونے کا اعزاز حاصل ہے، اور وہ پاکستان کی جانب سے ٹی ٹوئنٹی میں 100 وکٹیں حاصل کرنے والی پہلی کھلاڑی ہیں، خواہ مرد ہوں یا خواتین۔ وہ 100 ون ڈے انٹرنیشنل میچز کھیلنے والی ابتدائی چار کھلاڑیوں میں بھی شامل ہیں۔