شادیوں میں اڑائے جانے والے پیسوں اور ڈالرز کے پیچھے کی حقیقت سامنے آگئی

معروف فوٹوگرافر عرفان احسن، جنہوں نے جنید صفدر اور عاطف اسلم کی شادی جیسے ایونٹس کور کیے، نے شادیوں میں اڑائے جانے والے لاکھوں روپے، ڈالر اور پاؤنڈز کی حقیقت بے نقاب کر دی۔

ایک انٹرویو میں انہوں نے انکشاف کیا کہ شادیوں میں اکثر نوٹ جعلی ہوتے ہیں۔ انہوں نے گلوکار ملکو کا واقعہ سنایا کہ کس طرح ایک شادی میں اسٹیج پر اڑائے گئے نوٹوں سے گاڑی میں پیٹرول ڈلوایا گیا، لیکن بعد میں پتہ چلا کہ وہ سب جعلی تھے۔ پولیس نے انہیں گرفتار کیا، تاہم ذاتی تعلقات کی وجہ سے معاملہ رفع دفع ہوا۔

دوسرے واقعے میں، انہوں نے بتایا کہ ایک شادی میں قوالوں کو نوٹ نہ اٹھانے کی ہدایت دی گئی اور وعدہ کیا گیا کہ رقم بعد میں دی جائے گی، مگر لاکھوں روپے جمع کیے گئے اور قوالوں کو کچھ بھی نہ دیا گیا۔

تیسرے انکشاف میں ان کی ٹیم کے ایک رکن نے بتایا کہ اکثر شادیوں میں اڑنے والے ڈالر صرف ابتدائی چند اصلی ہوتے ہیں، باقی سب فوٹو کاپی ہوتے ہیں۔

عرفان احسن کے ان بیانات نے سوشل میڈیا پر جاری شادیوں کی نمود و نمائش کے رجحان پر سوالات اٹھا دیے ہیں۔