گھر میں دال میں زیادہ پانی ڈالا جاتا تھا تاکہ 4 لوگ کھانا کھا سکیں: شاہ رخ خان

بھارتی میڈیا نے بالی ووڈ کے کنگ شاہ رخ خان کی ایک ویڈیو شیئر کی ہے جس میں وہ اپنے بچپن کے مشکل دنوں اور غربت پر گفتگو کرتے نظر آتے ہیں۔ یہ ویڈیو کئی برس قبل سینئر اداکار انوپم کھیر کے شو میں دیے گئے شاہ رخ کے بیان پر مبنی ہے۔

شاہ رخ خان نے اس شو میں اپنے بچپن کی حالت پر بات کرتے ہوئے کہا تھا کہ ہم جہاں سے آئے ہیں، وہاں ہمارے گھر میں دال میں اضافی پانی ڈالا جاتا تھا تاکہ ہم چار لوگ کھانا کھا سکیں۔ اس وقت کسی کو یہ نہیں پتا تھا، نہ کسی نے سوچا تھا کہ میں یہاں تک پہنچوں گا۔

انہوں نے مزید کہا کہ جب میرے جیسا ایک عام شکل وصورت والا انسان اس مقام تک پہنچ سکتا ہے تو یہ ثابت ہوتا ہے کہ کچھ بھی ممکن ہے۔

2018 میں ایک انٹرویو کے دوران شاہ رخ خان نے بچپن کی یادیں شیئر کرتے ہوئے کہا تھا: "جب میں بچہ تھا تو ہمیشہ بڑا ہونا چاہتا تھا، لیکن اب جب بوڑھا ہوگیا ہوں تو مجھے اپنا بچپن یاد آتا ہے۔ وہ وقت ہماری زندگی کا بہترین دور ہوتا ہے جب ہم ہر پریشانی سے آزاد ہوتے ہیں۔

انہوں نے یہ بھی کہا کہ مجھے یاد ہے کہ میں 25 سال کا تھا اور تب تک اپنی والدہ کے ہاتھوں سے کھانا کھاتا تھا۔

یاد رہے کہ شاہ رخ خان کے والد، تاج محمد خان پٹھان تھے، جو پشاور سے بھارت آئے تھے۔ ان کے والد کا انتقال کینسر کے باعث اس وقت ہوا جب شاہ رخ کی عمر صرف 15 سال تھی، اور ان کی والدہ، لطیف فاطمہ خان، بھی طویل عرصے تک بیمار رہنے کے بعد 1990 میں انتقال کر گئی تھیں۔