یومِ ولادتِ قائدِ اعظم: مزارِ قائد پر گارڈز کی تبدیلی کی پروقار تقریب

کراچی میں بانیٔ پاکستان قائدِ اعظم محمد علی جناحؒ کے یومِ پیدائش کے موقع پر مزارِ قائد پر گارڈز کی تبدیلی کی باوقار اور پروقار تقریب منعقد ہوئی۔ تقریب میں روایتی احترام اور عسکری نظم و ضبط نمایاں دکھائی دیا۔

ملک بھر میں آج قائدِ اعظم کا یومِ ولادت قومی جوش و جذبے اور خلوص کے ساتھ منایا جا رہا ہے۔ شہری مختلف تقریبات میں بابائے قوم کو خراجِ عقیدت پیش کر رہے ہیں۔

گارڈز کی تبدیلی کی تقریب میں پاک فوج کے چاق و چوبند دستے نے مزارِ قائد پر سلامی دی، جس کے بعد پاکستان ملٹری اکیڈمی کے کیڈٹس نے گارڈز کی ذمہ داریاں سنبھال لیں۔ شرکا نے اس دلکش منظر کو بے حد سراہا۔

تقریب کے مہمانِ خصوصی میجر جنرل افتخار حسین چوہدری (ہلالِ امتیاز) تھے، جنہوں نے مزارِ قائد پر فاتحہ خوانی کی اور بانیِ پاکستان کی قومی خدمات کو خراجِ تحسین پیش کیا۔

یہ بھی پڑھیں : یومِ قائد پر آئی ایس پی آر کا نیا ملی نغمہ ’’پیغامِ قائد‘‘ جاری

یومِ قائد کے موقع پر ملک بھر میں عام تعطیل کے باعث سرکاری و نجی اداروں میں خصوصی پروگرامز کا انعقاد جاری ہے۔ مختلف شہروں میں لوگ بڑی تعداد میں مزاروں، یادگاروں اور تقریبات میں شرکت کر رہے ہیں۔

تعلیمی ادارے، تنظیمیں اور سماجی انجمنیں خصوصی سیمینارز اور نشستوں کا اہتمام کر رہی ہیں، جن میں قائدِ اعظم کے اصولوں، قومی جدوجہد اور ان کے وژن پر روشنی ڈالی جا رہی ہے۔

شہریوں نے اس دن کو قائد کے نظریات کی تجدید اور ملک کے روشن مستقبل کے عزم کے طور پر منانے کا عہد کیا ہے، جبکہ قوم بھر میں ان کی تعلیمات پر عمل پیرا ہونے کے جذبات کا اظہار کیا جا رہا ہے۔