ٹام کروز کو 45 سال بعد پہلا اعزازی آسکر ایوارڈ مل گیا

ہالی ووڈ کے عالمی شہرت یافتہ ایکشن اسٹار ٹام کروز کو بالآخر اُن کے طویل، کامیاب اور اثر انگیز کیریئر کے اعتراف میں پہلا اعزازی آسکر ایوارڈ دے دیا گیا۔ یہ وہ اعزاز ہے جس کا انتظار اداکار نے تقریباً ساڑھے چار دہائیوں تک کیا۔

اتوار کی شب لاس اینجلس میں منعقد ہونے والی گورنرز ایوارڈز 2024 کی شاندار تقریب میں اکیڈمی آف موشن پکچر آرٹس اینڈ سائنسز نے ٹام کروز کو یہ ٹرافی پیش کی۔ مقررہ اعلان کے ساتھ ہی ہال میں موجود حاضرین ایک منٹ تک کھڑے ہو کر اداکار کو خراجِ تحسین پیش کرتے رہے۔

63 سالہ ٹام کروز کو آج تک بہترین اداکاری کے لیے چار بار آسکر نامزدگیاں ملیں، مگر وہ کوئی ایوارڈ جیت نہ سکے۔ اس بار بھی ایوارڈ کسی فلمی کردار پر نہیں بلکہ ان کی مجموعی خدمات اور سینما میں گراں قدر شراکت کے اعتراف میں دیا گیا۔

اعزازی آسکر وصول کرتے ہوئے ٹام کروز نے مسکراتے ہوئے کہا:
"فلمیں بنانا صرف میرا کام نہیں، یہ میرا وجود ہے۔”

اداکار نے اپنے 45 سالہ فلمی سفر کے دوران ساتھ دینے والے ہدایتکاروں، پروڈیوسرز، فنکاروں اور اپنی ٹیم کا شکریہ بھی ادا کیا۔

دیگر اعزازی آسکر حاصل کرنے والے فنکار

اس سال ٹام کروز کے علاوہ درج ذیل شخصیات کو بھی اعزازی آسکر سے نوازا گیا:

• ڈیبی ایلن – معروف کوریوگرافر اور پروڈیوسر

• وین تھامس – مشہور پروڈکشن ڈیزائنر

• ڈولی پارٹن – عالمی شہرت یافتہ گلوکارہ اور نغمہ نگار

یہ ایوارڈز فلم انڈسٹری میں ان تمام فنکاروں کی دیرپا خدمات اور تخلیقی سفر کا اعتراف ہیں۔