ہانیہ عامر کو بھارتی فلم "سردار جی 3” سے باہر کر دیا گیا

پاکستانی اداکارہ ہانیہ عامر کو مبینہ طور پر پہلی بھارتی فلم سردار جی 3 سے باہر کر دیا گیا ہے۔

یہ فیصلہ مقبوضہ کشمیر میں پہلگام کے فالس فلیگ آپریشن کے بعد پاک بھارت کشیدگی میں اضافے کے بعد کیا گیا ہے، جس میں 26 افراد ہلاک ہوئے تھے۔

ہانیہ عامر نے رواں سال کے آغاز میں اس پروجیکٹ پر دستخط کیے تھے اور دلجیت دوسانجھ و نیرو باجوہ کے ساتھ برطانیہ میں اپنا شیڈول مکمل کیا تھا۔ تاہم، اطلاعات ہیں کہ وہ اب سردار جی 3 کا حصہ نہیں رہیں گی اور فلم کے میکرز ان کی جگہ دوسری ہیروئن کی تلاش میں ہیں۔

یہ اقدام بھارت میں پاکستانی فنکاروں پر دوبارہ پابندیاں عائد کرنے کے بعد سامنے آیا ہے، جو کہ فیڈریشن آف ویسٹرن انڈیا سنیما کی جانب سے پہلگام دہشت گردانہ حملے کے بعد کیا گیا تھا۔ اگر ہانیہ عامر کو فلم سے نکال دیا جاتا ہے تو اس کی ریلیز میں تاخیر ہو سکتی ہے، جو ابتدائی طور پر جون میں متوقع تھی۔

اب تک ہانیہ عامر یا سردار جی 3 کی ٹیم کی جانب سے اس حوالے سے کوئی رسمی بیان سامنے نہیں آیا۔ دوسری طرف، یہ خبریں بھی ہیں کہ فواد خان کی فلم ابیر گلال کو 9 مئی کو ریلیز کی اجازت نہیں دی جائے گی، مگر اس بارے میں بھی فلم کی ٹیم نے کوئی اعلان نہیں کیا۔