میری ٹرمپ کا ڈونلڈ ٹرمپ کی صحت سے متعلق تشویش کا اظہار

امریکی صدر ڈونلڈ ٹرمپ کی بھتیجی میری ٹرمپ نے اپنے چچا کی صحت کے حوالے سے تشویش کا اظہار کرتے ہوئے دعویٰ کیا ہے کہ ان کی جسمانی اور ذہنی حالت بتدریج خراب ہو رہی ہے۔

غیر ملکی میڈیا رپورٹس کے مطابق میری ٹرمپ نے اپنے ہفتہ وار نیوز لیٹر میں ڈونلڈ ٹرمپ کی صحت سے متعلق جاری قیاس آرائیوں پر تبصرہ کیا۔

میری ٹرمپ کے مطابق امریکی صدر کی جسمانی اور ذہنی صحت میں واضح تبدیلیاں دیکھی جا رہی ہیں، جنہیں مزید نظر انداز نہیں کیا جا سکتا۔

انہوں نے ڈونلڈ ٹرمپ کے غیر معمولی رویے اور رات گئے سوشل میڈیا پوسٹس کا حوالہ دیتے ہوئے کہا کہ بظاہر وہ منطقی محسوس ہو سکتے ہیں، مگر نفسیاتی طور پر تناؤ اور دباؤ کا شکار دکھائی دیتے ہیں۔

میری ٹرمپ نے مزید کہا کہ ڈونلڈ ٹرمپ اس وقت شدید ذہنی دباؤ سے گزر رہے ہیں اور انہیں سب سے زیادہ خوف ذلت یا عوامی شرمندگی سے محسوس ہوتا ہے۔

ان کے مطابق مسلسل دباؤ اور نفسیاتی کشمکش امریکی صدر کے رویے اور فیصلوں پر بھی اثر انداز ہو سکتی ہے۔

دوسری جانب وائٹ ہاؤس نے میری ٹرمپ کے ان دعوؤں کو مسترد کرتے ہوئے کہا ہے کہ امریکی صدر کی صحت سے متعلق پھیلائی جانے والی قیاس آرائیاں درست نہیں ہیں۔