یوٹیوب کی پہلی ویڈیو کی 20ویں سالگرہ

آج سوشل میڈیا کی تاریخ میں ایک سنگ میل کا دن ہے، کیونکہ دنیا کا دوسرا سب سے بڑا سرچ انجن یوٹیوب آج اپنی 20ویں سالگرہ منا رہا ہے۔ یہ پلیٹ فارم، جو اربوں لوگوں کے لیے معلومات، تفریح، اور اظہار کا ذریعہ بن چکا ہے، آج سے دو دہائیاں قبل 2005 میں لانچ کیا گیا تھا۔

یوٹیوب کی پہلی ویڈیو، جسے اس کے شریک بانی جاوید کریم نے اپلوڈ کیا تھا، آج بھی ایک یادگار حیثیت رکھتی ہے۔
اس ویڈیو کا عنوان تھا "Me at the zoo” — ایک سادہ سا 19 سیکنڈ کا کلپ، جس میں جاوید کریم سان ڈیاگو کے چڑیا گھر میں ہاتھیوں کے سامنے کھڑے ہو کر گفتگو کرتے نظر آتے ہیں۔

یہ ویڈیو محض ایک عام لمحے کو قید کرنے کی کوشش تھی، لیکن وقت کے ساتھ یہ ڈیجیٹل دنیا کی ایک علامت بن گئی۔ اب تک اس ویڈیو کو 35 کروڑ سے زائد بار دیکھا جا چکا ہے اور 1 کروڑ سے زیادہ تبصرے اس پر کیے جا چکے ہیں — اور یہ تعداد مسلسل بڑھ رہی ہے۔