بھارت میں 200 کلو چرس چوہوں نے کھا لی، عدالت نے ملزم کو بری کر دیا

بھارت کی ریاست جھارکھنڈ میں ایک حیران کن واقعہ پیش آیا جہاں پولیس نے عدالت کو بتایا کہ ضبط کی گئی 200 کلو چرس چوہوں نے مبینہ طور پر خراب کر دی، جس کے بعد عدالت نے ملزم کو ناکافی شواہد کی بنیاد پر بری کر دیا۔

 میڈیا رپورٹس کے مطابق 2022 میں درج اس مقدمے میں جھارکھنڈ پولیس نے دعویٰ کیا تھا کہ شاہراہ پر روکی گئی ایک گاڑی سے بھاری مقدار میں چرس برآمد کی گئی ہے، جسے ثبوت کے طور پر محفوظ کیا گیا تھا۔

کیس کی سماعت کے دوران پولیس حکام نے عدالت کو بتایا کہ وہ منشیات کو پیش نہیں کر سکتے کیونکہ گودام میں چوہوں نے مبینہ طور پر اسے کھا لیا یا خراب کر دیا ہے، جس پر عدالت نے سخت برہمی کا اظہار کیا۔

عدالت نے تفصیلات کا جائزہ لیتے ہوئے پولیس رپورٹ میں متعدد تضادات کی نشاندہی کی، جن میں گرفتاری کا وقت، مقام، اور یہ کہ ملزم کو کس نے پکڑا جبکہ اس کے مبینہ ساتھی کیسے فرار ہوئے — جیسے سوالات شامل تھے۔

جج کے مطابق یہ بات بھی حیران کن ہے کہ ایک مصروف شاہراہ سے گرفتاری ہونے کے باوجود کوئی آزاد شہری بطور گواہ پیش نہیں کیا گیا، حالانکہ موقع کے آس پاس رہائشی علاقے موجود تھے۔

پولیس کی جانب سے ناکافی شواہد، خراب شدہ منشیات اور بیان کردہ تضادات نے پورے کیس کی بنیاد کمزور کر دی، جس پر عدالت نے کہا کہ مادی ثبوت نہ ہونے کی وجہ سے مقدمہ ثابت نہیں کیا جا سکتا۔

 عدالت نے اپنے فیصلے میں مرکزی ملزم کو تمام الزامات سے بری کرتے ہوئے کہا کہ جب ثبوت ہی موجود نہیں تو شک کا فائدہ ملزم کو دینا قانون کا تقاضا ہے۔