9 مئی کیس: محمود الرشید، عمر چیمہ اور یاسمین راشد کو 10،10 سال قید

لاہور: انسداد دہشت گردی عدالت نے 9 مئی سے متعلق ایک اور اہم مقدمے کا فیصلہ سناتے ہوئے پاکستان تحریک انصاف کے کئی سینئر رہنماؤں کو سزا سنا دی، جبکہ ایک اہم رہنما کو بری کردیا گیا۔

لاہور کی انسداد دہشت گردی عدالت کے جج منظر علی گل نے کوٹ لکھپت جیل میں 9 مئی کو پولیس کی گاڑیاں جلانے کے مقدمے کا محفوظ فیصلہ سنایا۔ کیس کا فیصلہ سخت سکیورٹی انتظامات کے درمیان سنایا گیا۔

عدالت نے پی ٹی آئی رہنما محمود الرشید، عمر چیمہ، اعجاز چوہدری اور ڈاکٹر یاسمین راشد کو جرم ثابت ہونے پر 10،10 سال قید کی سزا سنائی۔ فیصلے کے بعد سیاسی حلقوں میں اس پر مختلف ردعمل سامنے آنا شروع ہوگیا۔

استغاثہ کے مطابق ملزمان پر 9 مئی کے پرتشدد واقعات کے دوران پولیس گاڑیوں کو نذر آتش کرنے اور امن و امان کی صورتحال خراب کرنے کے الزامات تھے۔ عدالت نے شواہد اور گواہوں کے بیانات کی روشنی میں فیصلہ سنایا۔

دوسری جانب عدالت نے اسی مقدمے میں نامزد پی ٹی آئی کے سینئر رہنما شاہ محمود قریشی کو ناکافی شواہد کی بنیاد پر بری کردیا۔ ان کی بریت کو پارٹی کے لیے جزوی ریلیف قرار دیا جا رہا ہے۔

9 مئی کے واقعات کے بعد ملک بھر میں مختلف شہروں میں متعدد مقدمات درج کیے گئے تھے، جن میں سیاسی رہنماؤں اور کارکنوں پر توڑ پھوڑ، جلاؤ گھیراؤ اور سرکاری املاک کو نقصان پہنچانے کے الزامات شامل ہیں۔