فیفا ورلڈ کپ: آسٹریلیا کو شکست، امریکا نے 96 سال میں پہلی بار مسلسل دو میچ جیت لیے

فیفا ورلڈ کپ 2026 کے گروپ ڈی کے ایک اہم میچ میں امریکا نے آسٹریلیا کو 0-2 سے شکست دے کر تاریخ رقم کر دی۔ اس کامیابی کے ساتھ امریکا فیفا ورلڈ کپ کی 96 سالہ تاریخ میں پہلی مرتبہ امریکی ٹیم مسلسل دو ورلڈ کپ میچ جیتنے میں کامیاب ہوئی۔

سیئٹل میں کھیلے گئے میچ میں امریکی ٹیم نے آغاز ہی سے کھیل پر اپنی گرفت مضبوط رکھی اور گیند پر زیادہ تر قبضہ برقرار رکھا۔ امریکا کو 11ویں منٹ میں برتری اس وقت ملی جب آسٹریلوی کھلاڑی کیمرون برگیس نے غلطی سے گیند اپنے ہی جال میں پہنچا دی۔

پہلے ہاف کے اختتامی لمحات میں الیکس فری مین نے دوسرا گول اسکور کیا، جسے وی اے آر جائزے کے بعد درست قرار دیا گیا۔ اس گول کے بعد امریکا نے 0-2 کی برتری حاصل کر لی جو میچ کے اختتام تک برقرار رہی۔

مزید پڑھیں: جنوبی افریقا ویمنز انڈر 19 ٹیم پہلی بار پاکستان کا دورہ کرے گی

دوسرے ہاف میں آسٹریلیا نے واپسی کی کوشش کی اور کئی حملے بھی کیے، تاہم امریکی دفاع نے انہیں کامیاب نہ ہونے دیا۔ امریکی ٹیم نے منظم کھیل کا مظاہرہ کرتے ہوئے میچ اپنے نام کر لیا اور ناک آؤٹ مرحلے میں جگہ بھی یقینی بنا لی۔

اس فتح کے بعد امریکا گروپ ڈی میں 6 پوائنٹس کے ساتھ سرفہرست ہو گیا ہے۔ ماہرین کے مطابق امریکا فیفا ورلڈ کپ میں یہ کامیابی ٹیم کے اعتماد میں اضافے کا باعث بنے گی اور آئندہ مرحلے میں اسے مضبوط حریف کے طور پر پیش کرے گی۔