گلگت بلتستان میں حکومت سازی میں تاخیر، کامیاب ارکان کے گزٹ نوٹیفکیشن تاحال جاری نہ ہوسکے

گلگت بلتستان میں حکومت سازی کا عمل سست روی کا شکار ہے کیونکہ گلگت بلتستان حکومت سازی کے لیے ضروری کامیاب امیدواروں کے گزٹ نوٹیفکیشن تاحال جاری نہیں کیے جا سکے۔ ذرائع کے مطابق نوٹیفکیشن کے اجرا میں تاخیر کے باعث نئی حکومت کی تشکیل کا عمل بھی آگے نہیں بڑھ سکا۔

ذرائع کا کہنا ہے کہ الیکشن کمیشن نے ابھی تک کامیاب ارکان کے گزٹ نوٹیفکیشن جاری نہیں کیے۔ ان نوٹیفکیشنز کے اجرا کے بعد ہی مخصوص نشستوں کی الاٹمنٹ کا مرحلہ شروع کیا جا سکے گا، جو حکومت سازی کے عمل کا اہم حصہ ہے۔

ذرائع نے مزید بتایا کہ گزٹ نوٹیفکیشن جاری ہونے کے بعد مخصوص نشستوں کی تقسیم کے لیے کم از کم تین دن درکار ہوں گے۔ اس عمل کی تکمیل کے بعد ہی اسمبلی کی مکمل تشکیل ممکن ہو سکے گی۔

مزید پڑھیں: وزیراعظم اور سعودی ولی عہد کا ایران امریکا امن معاہدے کے اگلے مرحلے کو آگے بڑھانے پر اتفاق

آئینی تقاضوں کے مطابق انتخابات کے 14 دن کے اندر کامیاب امیدواروں کے گزٹ نوٹیفکیشن جاری کرنا لازمی ہے۔ گلگت بلتستان انتخابات کے انعقاد کو 21 جون کو 14 دن مکمل ہو جائیں گے، جس کے باعث نوٹیفکیشن میں تاخیر پر سوالات اٹھ رہے ہیں۔

دوسری جانب جی بی اے 6 ہنزہ سے منتخب آزاد امیدوار نیک نام کریم نے پاکستان پیپلز پارٹی میں شمولیت اختیار کر لی ہے۔ الیکشن کمیشن کے مطابق نیک نام کریم نے چیف الیکشن کمشنر کو پیپلز پارٹی میں شمولیت کا تصدیقی بیان جمع کرا دیا ہے۔ اس پیش رفت کو گلگت بلتستان حکومت سازی کے عمل میں ایک اہم سیاسی تبدیلی کے طور پر دیکھا جا رہا ہے۔