جلال پور پیر والا میں سیلاب سے موٹروے ایم 5 بند

ملتان کی تحصیل جلال پور پیر والا میں سیلاب کی وجہ سے صورتحال سنگین ہوگئی ہے۔ انتظامیہ نے موٹروے ایم 5 کو ہر قسم کی ٹریفک کے لیے بند کر دیا ہے۔ حکام کا کہنا ہے کہ سیلابی پانی کے کٹاؤ سے موٹروے میں شگاف پڑنے کا خدشہ ہے۔

پی ڈی ایم اے پنجاب، این ایچ اے اور دیگر ادارے موٹروے کو محفوظ بنانے کے لیے کام کر رہے ہیں۔ اس مقصد کے لیے سینڈ بیگ اور پتھر استعمال کیے جا رہے ہیں تاکہ بڑے نقصان سے بچا جا سکے۔ حکام کو امید ہے کہ اگلے 24 گھنٹوں میں پانی کی سطح میں کمی آ جائے گی۔

دریاؤں میں پانی کے بہاؤ میں بھی تیزی سے کمی ہو رہی ہے۔ پنجند کے مقام پر پانی کا بہاؤ کم ہو کر 3 لاکھ 92 ہزار کیوسک رہ گیا ہے جبکہ گڈو بیراج پر یہ بہاؤ 6 لاکھ 27 ہزار کیوسک ہے۔

موٹروے پولیس کے مطابق ٹریفک کو متبادل راستوں پر منتقل کیا جا رہا ہے۔ نارتھ باؤنڈ ٹریفک اوچ شریف، جھانگرہ اور جلال پور انٹرچینج سے موڑی جا رہی ہے، جبکہ ساؤتھ باؤنڈ ٹریفک کو شاہ شمس، شیر شاہ اور شجاع آباد ساؤتھ سے گزارا جا رہا ہے۔