اپریل میں مہنگائی 8 سے 9 فیصد تک بڑھنے کا امکان

پاکستان میں اپریل کے دوران مہنگائی میں اضافے کا امکان ظاہر کیا گیا ہے، اور وزارت خزانہ کی تازہ اقتصادی رپورٹ کے مطابق شرحِ مہنگائی 8 سے 9 فیصد کے درمیان رہنے کی توقع ہے۔

رپورٹ میں بتایا گیا ہے کہ مارچ میں مہنگائی کی شرح 7.3 فیصد ریکارڈ کی گئی تھی جبکہ فروری میں یہ 7 فیصد تھی، جس سے ظاہر ہوتا ہے کہ قیمتوں میں بتدریج اضافہ جاری ہے۔ حکام کے مطابق اس اضافے کی بڑی وجوہات میں توانائی کی بڑھتی ہوئی قیمتیں اور عالمی سپلائی چین میں رکاوٹیں شامل ہیں۔

رپورٹ میں یہ بھی کہا گیا ہے کہ مشرق وسطیٰ میں جاری جغرافیائی کشیدگی نے عالمی منڈی میں اجناس کی قیمتوں کو متاثر کیا ہے، جس کا براہِ راست اثر پاکستان میں خوراک اور دیگر ضروری اشیاء کی قیمتوں پر پڑ رہا ہے۔ توانائی کی قیمتوں میں اتار چڑھاؤ بھی معیشت کے لیے بڑا چیلنج بنتا جا رہا ہے۔

چینی سائنسدانوں نے کاربن ڈائی آکسائیڈ کو طیاروں کے ایندھن میں تبدیل کرنے کی ٹیکنالوجی تیار کرلی

وزارت خزانہ کے مطابق جولائی سے مارچ تک اوسط مہنگائی کی شرح 5.7 فیصد رہی، جبکہ گزشتہ سال اسی مدت میں یہ 5.3 فیصد تھی، جو مجموعی طور پر قیمتوں میں اضافے کے رجحان کی نشاندہی کرتی ہے۔

رپورٹ میں یہ بھی بتایا گیا ہے کہ معاشی اشاریوں میں ملا جلا رجحان دیکھا جا رہا ہے۔ ایک جانب ترسیلات زر اور درآمدات میں اضافہ ہوا ہے، جبکہ برآمدات اور براہِ راست غیر ملکی سرمایہ کاری میں کمی ریکارڈ کی گئی ہے۔

ماہرین کے مطابق توانائی کی قیمتوں میں اتار چڑھاؤ معیشت کے لیے سب سے بڑا خطرہ ہے، جو نہ صرف مہنگائی بلکہ پیداوار اور ترقی کی شرح کو بھی متاثر کر سکتا ہے۔ اقتصادی ماہرین کا کہنا ہے کہ قیمتوں میں استحکام کے لیے توانائی کے شعبے میں مؤثر پالیسی اور عالمی حالات کے مطابق سپلائی چین کی بہتری ضروری ہے۔