لیڈی ریڈنگ اسپتال پشاور میں پہلی بار روبوٹک سرجری کا آغاز

لیڈی ریڈنگ اسپتال میں پہلی بار روبوٹک سرجری کا باقاعدہ آغاز کر دیا گیا ہے، جو جدید طبی سہولیات کی جانب ایک اہم پیش رفت قرار دی جا رہی ہے۔

یہ جدید طریقہ علاج پشاور کے مریضوں کے لیے بڑی سہولت ثابت ہوگا، جہاں اب پیچیدہ آپریشنز جدید ٹیکنالوجی کی مدد سے کیے جا سکیں گے۔

روبوٹک سرجری ایک ایسا جدید نظام ہے جس میں سرجری ڈاکٹرز ہی کرتے ہیں تاہم انہیں ایک جدید روبوٹک سسٹم کی مدد حاصل ہوتی ہے، جس کے ذریعے باریک آلات اور ہائی ڈیفینیشن کیمرے استعمال کیے جاتے ہیں۔

اس جدید نظام کے مؤثر استعمال کے لیے ڈاکٹرز کو خصوصی تربیت بھی فراہم کی گئی ہے تاکہ وہ اس ٹیکنالوجی سے مکمل فائدہ اٹھا سکیں۔

ماہرین کے مطابق روبوٹک سرجری کے ذریعے پیچیدہ آپریشنز زیادہ درستگی اور کم وقت میں ممکن ہو جاتے ہیں جبکہ انسانی غلطیوں کے امکانات بھی نمایاں طور پر کم ہو جاتے ہیں۔

اس طریقہ علاج کے باعث مریضوں کو کم زخم، کم خون کا ضیاع، انفیکشن کے کم خطرات اور جلد صحت یابی جیسے فوائد حاصل ہوتے ہیں۔

اس سہولت کے آغاز کے بعد خیبرپختونخوا کے مریضوں کو جدید علاج کے لیے دیگر شہروں یا بیرون ملک جانے کی ضرورت کم ہو جائے گی، جو صحت کے شعبے میں ایک بڑی کامیابی سمجھی جا رہی ہے۔