پاکستان اسٹیل ملز کی بحالی کے لیے پاکستان اور روس کے درمیان معاہدہ

پاکستان اور روس کے درمیان پاکستان اسٹیل ملز (PSM) کی بحالی اور جدیدکاری کے لیے معاہدہ طے پا گیا ہے، جو ملک کے صنعتی شعبے کے فروغ میں ایک اہم پیش رفت ہے۔

وزیراعظم کے مشیر برائے صنعت و پیداوار ہارون اختر خان کی سربراہی میں ایک اعلیٰ سطحی پاکستانی وفد نے روس کا دورہ کیا، جہاں یہ معاہدہ ہوا۔ معاہدے پر پاکستان کے سیکریٹری برائے صنعت و پیداوار سید سیف انجم اور روس کے نمائندے وادیِم ویلیچکو نے دستخط کیے۔

اس موقع پر ہارون اختر خان نے کہا، "یہ تعاون پاکستان کی صنعتی ترقی کے ایک نئے دور کا آغاز کرے گا۔ 1971 میں سابق سوویت یونین کی مدد سے قائم ہونے والی پاکستان اسٹیل ملز ایک بار پھر روس کے تعاون سے بحال ہونے جا رہی ہے۔”

انہوں نے مزید کہا کہ اسٹیل ملز کی بحالی وزیراعظم شہباز شریف کے صنعتی ترقی کے وژن کی عکاسی کرتی ہے۔ "یہ شراکت داری صنعتی پیداوار کو فروغ دے گی اور روزگار کے مواقع پیدا کرے گی،” انہوں نے کہا۔