اسلام آباد میں امریکا ایران امن مذاکرات، جنگ بندی پر سوالات برقرار

اسلام آباد: امریکا اور ایران کے درمیان اعلیٰ سطحی براہِ راست امن مذاکرات کی میزبانی کیلئے تیار ہے، تاہم جنگ بندی کی شرائط اور مبینہ خلاف ورزیوں سے متعلق سوالات بدستور موجود ہیں۔

وفاقی دارالحکومت کے حکام کے مطابق صورتحال قابو میں ہے، اگرچہ سفارتی حلقوں میں جنگ بندی کے معاہدے، خصوصاً لبنان کے حوالے سے ابہام پر گفتگو جاری ہے۔

اسلام آباد میں ایک اہم ذریعے سے جب اس معاملے پر سوال کیا گیا تو ان کا مختصر مگر معنی خیز جواب تھا: "الحمد للہ، اب سب کچھ ٹھیک ہے”، جو حکومتی اعتماد کی عکاسی کرتا ہے۔

پاکستان نے امریکا ایران جنگ بندی معاہدے میں لبنان کی شمولیت کی تصدیق کردی

ان مذاکرات کو ایک اہم سفارتی موقع قرار دیا جا رہا ہے، جس میں واشنگٹن اور تہران سے اعلیٰ سطحی وفود شرکت کریں گے۔ پاکستان خود کو عالمی سطح پر امن کے سہولت کار کے طور پر پیش کرنے کی کوشش کر رہا ہے۔

پاکستان کی حمایت سے طے پانے والی دو ہفتوں کی جنگ بندی کو بعض چیلنجز کا سامنا رہا ہے، جن میں مبینہ خلاف ورزیاں اور سبوتاژ کی کوششیں شامل ہیں۔ سفارتی ذرائع کے مطابق اسرائیل ان عناصر میں شامل ہے جو اس معاہدے کو متاثر کرنے کی کوشش کر رہے ہیں۔

حکام کا کہنا ہے کہ ایسے حساس معاملات میں ابہام اور خلاف ورزیاں غیر معمولی نہیں ہوتیں، تاہم وہ پُراعتماد ہیں کہ یہ مسائل بامعنی مذاکرات اور پائیدار امن کی راہ میں رکاوٹ نہیں بنیں گے۔ اسلام آباد میں پیش رفت سے باخبر ذرائع سخت رازداری برقرار رکھے ہوئے ہیں۔