سندھ بھر میں شدید گرمی، ہیٹ ویو کا خطرہ

سندھ بھر میں شدید گرمی کے باعث ہیٹ ویو کا خطرہ بڑھنے لگا ہے، جس پر محکمہ موسمیات نے الرٹ جاری کیا ہے۔ حکام کے مطابق بیشتر علاقوں میں موسم گرم، شدید گرم اور خشک رہنے کا امکان ہے، جس سے عوام کو مشکلات کا سامنا ہوسکتا ہے۔

محکمہ موسمیات کے مطابق آج سے 3 مئی تک سندھ کے وسطی اور بالائی علاقوں میں ہیٹ ویو کا امکان ہے۔ مزید یہ کہ جامشورو، دادو اور شہید بینظیر آباد میں درجہ حرارت معمول سے 4 سے 6 ڈگری زیادہ رہ سکتا ہے۔

اسی طرح گھوٹکی اور سانگھڑ میں بھی درجہ حرارت میں نمایاں اضافہ متوقع ہے۔ اس کے علاوہ خیرپور، نوشہروفیروز، جیکب آباد، لاڑکانہ اور سکھر بھی شدید گرمی کی لپیٹ میں رہیں گے۔

مزید پڑھیں: جوڈیشل کمیشن نے اسلام آباد ہائیکورٹ کے تین ججز کے تبادلے منظور کر لیے

محکمہ موسمیات نے عوام کو احتیاطی تدابیر اختیار کرنے کی ہدایت کی ہے۔ خاص طور پر بچوں، خواتین اور بزرگوں کو دن کے اوقات میں دھوپ سے بچنے اور زیادہ پانی پینے کا مشورہ دیا گیا ہے تاکہ ہیٹ اسٹروک سے محفوظ رہا جا سکے۔

دوسری جانب کراچی میں آئندہ تین روز موسم گرم رہنے کا امکان ہے۔ درجہ حرارت 34 سے 37 ڈگری سینٹی گریڈ تک جا سکتا ہے، جس سے سندھ بھر میں شدید گرمی اور ہیٹ ویو کا خطرہ مزید بڑھنے لگا ہے۔