چین میں زرداری نے تین مفاہمتی یادداشتوں پر دستخط کردیے

اسلام آباد: پاکستان اور چین کے درمیان پانی کی صفائی، زرعی ٹیکنالوجی اور چائے کی صنعت کے شعبوں میں تعاون بڑھانے کے لیے تین مفاہمتی یادداشتوں پر دستخط کیے گئے ہیں۔

یہ معاہدے صدر آصف علی زرداری کے دورہ چین کے دوران طے پائے، جو یکم مئی تک جاری رہے گا۔ اس موقع پر دونوں ممالک کے حکام نے عملی تعاون کو فروغ دینے کے عزم کا اظہار کیا۔

پہلا معاہدہ سندھ بلدیاتی ادارے اور چینی کمپنی کے درمیان کراچی میں سمندری پانی کو قابل استعمال بنانے کے منصوبے کے لیے کیا گیا، جس کا مقصد شہر میں پانی کی فراہمی کو بہتر بنانا ہے۔

دوسرا معاہدہ زرعی ٹیکنالوجی کے شعبے میں تعاون سے متعلق ہے، جس کے تحت جدید ٹیکنالوجی کے ذریعے زراعت کی پیداوار میں اضافہ کیا جائے گا اور کسانوں کو جدید سہولیات فراہم کی جائیں گی۔

تیسرا معاہدہ چائے کی صنعت کے فروغ کے لیے کیا گیا، جس میں دونوں ممالک کے درمیان تجارتی اور صنعتی تعاون بڑھانے پر اتفاق ہوا تاکہ اس شعبے کی ترقی کو فروغ دیا جا سکے۔

تقریب میں پاکستانی اور چینی اعلیٰ حکام کے علاوہ دیگر نمائندے بھی شریک تھے، جنہوں نے ان معاہدوں کو دوطرفہ تعلقات میں اہم پیش رفت قرار دیا۔

دوسری جانب صدر آصف علی زرداری نے چینی شہر چانگشا میں پروفیسر پین ژیانگ بن کو ان کی طبی خدمات پر ستارۂ پاکستان سے نوازا۔ انہیں دل کے امراض کے علاج اور پاکستانی بچوں کے علاج میں معاونت پر یہ اعزاز دیا گیا۔