محکمہ موسمیات کا گلگت بلتستان اور خیبر پختونخوا میں گلیشیئر جھیل پھٹنے کے سیلاب کا الرٹ جاری

پاکستان میٹرولوجیکل ڈپارٹمنٹ (پی ایم ڈی) نے گلگت بلتستان اور خیبر پختونخوا کے بالائی علاقوں میں گلیشیئر جھیل پھٹنے (GLOF) کے خطرے کا الرٹ جاری کر دیا ہے۔ یہ خطرہ ایک متوقع مغربی ہواؤں کے سلسلے کے باعث پیدا ہونے کا امکان ہے جو اس ہفتے کے آخر میں ملک کے شمالی علاقوں میں داخل ہو سکتا ہے۔

محکمہ موسمیات کے مطابق GLOF سے مراد گلیشیائی جھیل سے اچانک پانی اور ملبے کا اخراج ہے، جس کے نتیجے میں پہاڑی علاقوں میں جان و مال اور ذرائع معاش کو شدید نقصان پہنچ سکتا ہے۔ وزارتِ موسمیاتی تبدیلی کے مطابق گلگت بلتستان اور خیبر پختونخوا میں 71 لاکھ سے زائد افراد اس خطرے کی زد میں آ سکتے ہیں۔

پی ایم ڈی کے جاری کردہ بیان میں کہا گیا ہے کہ اتوار سے ایک معتدل مغربی ہواؤں کا سلسلہ بالائی علاقوں میں داخل ہوگا، جس کے باعث گلگت بلتستان اور خیبر پختونخوا میں وسیع پیمانے پر بارش، آندھی اور گرج چمک کے ساتھ بارش جبکہ بعض مقامات پر شدید بارشوں کا امکان ہے۔

پرنسس ڈیانا کی زندگی پر ان کی اپنی آواز میں نئی ڈاکیومنٹری بنانے کا اعلان

محکمہ موسمیات نے خبردار کیا ہے کہ درجہ حرارت میں اچانک اضافے اور پھر شدید بارشوں کے امتزاج سے گلیشیائی جھیلوں کے پھٹنے، ملبے کے بہاؤ اور سیلابی صورتحال کا خطرہ بڑھ جاتا ہے، خصوصاً ہوپر، گھلکن، ششپر، یاسین، فندر، بدسوات، لوئر ہنزہ، نگر، غذر، شگر، سوات، اپر چترال، دیر اور استور جیسے حساس علاقوں میں۔

مقامی آبادی کو ہدایت کی گئی ہے کہ وہ بارش کے دوران دریاؤں اور نالوں کے قریب نہ جائیں، مال مویشی اور ضروری سامان محفوظ بلند مقامات پر منتقل کریں، اور کسی بھی ہنگامی صورتحال میں فوری اطلاع دیں۔

محکمہ موسمیات نے یہ بھی کہا ہے کہ پانی کے رنگ میں تبدیلی یا غیر معمولی آوازوں کی صورت میں فوری احتیاطی اقدامات کیے جائیں۔

پاکستان میں 13 ہزار سے زائد گلیشیئرز موجود ہیں، تاہم ماہرین کے مطابق موسمیاتی تبدیلی کے باعث ان میں تیزی سے کمی ہو رہی ہے، جو مستقبل میں خطرات میں اضافہ کر سکتی ہے۔