ٹرمپ کا بیان: امریکی نیوی ایرانی بندرگاہوں کے خلاف ‘بحری قزاقوں’ جیسا کردار ادا کر رہی ہے

امریکی صدر ڈونلڈ ٹرمپ نے کہا ہے کہ امریکی نیوی ایران کی بندرگاہوں کے خلاف کارروائیوں میں “بحری قزاقوں” جیسا کردار ادا کر رہی ہے۔ یہ بیان انہوں نے ایران اور امریکہ و اسرائیل کے درمیان جاری کشیدگی کے تناظر میں دیا۔

غیر ملکی خبر ایجنسیوں کے مطابق ٹرمپ نے اپنے بیان میں کہا کہ امریکی بحریہ ایرانی جہازوں، سامان اور تیل پر قبضہ کر رہی ہے اور یہ کارروائیاں انتہائی منافع بخش ثابت ہو رہی ہیں۔ ان کے مطابق “ہم ایران کے جہازوں، کارگو اور تیل پر قبضہ کر رہے ہیں، یہ بہت منافع بخش کاروبار ہے۔ ہم بحری قزاقوں کی طرح ہیں لیکن ہم کھیل نہیں کھیل رہے۔”

یہ بیان ایسے وقت میں سامنے آیا ہے جب خطے میں ایران اور امریکہ کے درمیان کشیدگی میں اضافہ دیکھا جا رہا ہے اور بحری سرگرمیاں بھی تیز ہو گئی ہیں۔

لاہور میں فائرنگ، خاتون اور دو بچے قتل، ملزم نے خودکشی کرلی

رپورٹس کے مطابق امریکی نیوی نے حالیہ دنوں میں ایشیائی پانیوں میں ایران کی کچھ کشتیوں کو تحویل میں لیا ہے، جس کے بعد صورتحال مزید سنگین ہو گئی ہے۔ ایران نے ان اقدامات پر شدید ردعمل دیتے ہوئے اقوام متحدہ کی سلامتی کونسل میں باقاعدہ شکایت جمع کرائی ہے اور اپنے جہازوں کی فوری رہائی کا مطالبہ کیا ہے۔

ایرانی حکام کا مؤقف ہے کہ یہ اقدامات بین الاقوامی قوانین کی خلاف ورزی ہیں اور ان کا مقصد ایران پر دباؤ بڑھانا ہے۔

ماہرین کے مطابق سمندری راستوں پر اس نوعیت کی کشیدگی عالمی تجارت اور توانائی کی ترسیل کے لیے خطرہ بن سکتی ہے، کیونکہ تیل کی ترسیل کا بڑا حصہ انہی راستوں سے ہوتا ہے۔

امریکی انتظامیہ کا کہنا ہے کہ یہ اقدامات سیکیورٹی اور قانون نافذ کرنے کی پالیسی کا حصہ ہیں، تاہم خطے میں بڑھتی ہوئی کشیدگی عالمی سطح پر تشویش کا باعث بن رہی ہے۔